Որքան ծախս է կատարել Ազգային ժողովը վերջին մեկ ամսում և ինչի վրա են ծախսվել միլիոնավոր դրամները:

MediaHub-ը ուսումնասիրեց ծախսերի միայն մի հատվածը և որոշ դրվագներ ներկայացնում է իր ընթերցողին:

Այդպես, նոյեմբերի 28-ին, այսպես ասած՝ թարմ-թարմ, Ազգային ժողովն իրականացրել է 10 մլն դրամի գնում։ Armeps.am համակարգում տեսնում ենք, որ այս գնումն արվել է շենքերի շինությունների ընթացիկ նորոգման աշխատանքների համար, որը ենթադրում է շենքերի և կառույցների ընթացիկ նորոգում և պահպանում։ Armeps.am-ում այս գնումը երկու կետով է նշված՝ 3 մլն 139 հազար 800 դրամ և 6 մլն 860 հազար 200 դրամ, որոնց ընդհանուր գումարը կազմում է 10 մլն դրամ։

Նոյեմբերի 16-ին նույն հիմքով նորից գնում է իրականացրել Ազգային ժողովը, այս անգամ գումարի ընդհանուր թիվը կազմում է 2 005 280 դրամ։ Ընդհանուր առմամբ 2022 թվականի նոյեմբերին այս հիմքով իրականացվել է 12 005 280 դրամի գնում։

Եթե դիտարկենք վերջին երկու ամիսները, ապա նշված ժամանակահատվածում Ազգային ժողովի ամենամեծ գնումը եղել է հոկտեմբերին, խոսքը էներգետիկ ծառայությունների մասին է, մասնավորապես՝ գազի բաշխման համար կատարվել է 49 մլն 108 հազար 600 դրամի գնում։

ԱԺ-ի մասին հիշատակելիս չենք կարող չհիշել բազմաչարչար բուֆետը, որտեղ փոփոխությունները մամուլի սիրած թեմաներից են մշտապես եղել: Մենք պարզեցինք, որ վերջին ժամանակահատվածում ամենից խոշոր գնումները կատարվել են նաև խորհրդարանի ճաշարանի համար. այդպես, ԱԺ-ի ճաշարանում օգտագործվող սարքերի գնման համար, որոնք համարվում են վարչական սարքավորումներ, միայն նոյեմբերի 16-ին հարկատուներս վճարել ենք 12 մլն 474 հազար 499 դրամ։ Այնպես որ ավարտենք ԱԺ ծախսերի չնչին մասին հաշվարկը և մաղթենք ՝ «անուշ լինի»:

Շուշանիկ Միսկարյան