Եկեք նախ արձանագրենք՝ որն է ՀՀ-ն։ Այդ մասին այսօր հրավիրված ասուլիսում ասաց Նիկոլ Փաշինյանը՝ պատասխանելով հարցին, թե ինչպես է ինքը պատկերացնում այս իրավիճակում խաղաղության հաստատումը։
Նա իր հետ ՀՀ-ի քարտեզն էր բերել՝ առանց Արցախի, որն էլ ցուցադրեց։
«Ո՞րն է մեր ելակետը։ Ասում են ՀՀ-ն պատրաստվում է Տավուշի մարզի գյուղեր հանձնել Ադրբեջանին։ Մենք Տավուշից ոչ մի գյուղ չենք տալու։ Երբ Ադրբեջանը ներկայացնում է գյուղերի անուններ, ՀՀ-ում երբեք նման գյուղեր չեն եղել։ Ընդ որում, էս պատկերը, որ ցույց տվեցի, պատկեր չէ, այլ ՀՀ-ի դե յուրե ամրագրված տարածքներն են»,- նշեց նա։
Փաշինյանը կրկին հղում արեց Ալմա-Աթիի հռչակագրին՝ նշելով, որ այն դարձել է միմյանց տարածքները ճանաչելու հիմք։
«ԽՍՀՄ ժամանակ գոյություն ունեցած ադմինիստրատիվ սահմաններից այս կողմ գտնվողը Հայաստան է, այն կողմ գտնվողը՝ Ադրբեջան։ Ու մենք պետք է աշխատենք այդ սահմանը վերարտադրելու վրա։ Մենք պետք է դե յուրե պայմաններից ելնելով գործենք։ Ո՞ր փուլից սկսել դելիմիտացիայի գործընթաց։ Տարբեր տեսակետներ կան՝ ծայրից ծայր անել դելիմիտացիան, նոր անցնել գործողությունների, բարդ հատվածներից սկսել։ Կարող է դելիմիտացիան սկսվել Տավուշից, ես չեմ բացառում»,- ներկայացրեց նա։
Ըստ Փաշինյանի՝ բանակցային պրոցեսներում եղել է տպավորություն, որ մենք կարող ենք իրողությունը՝ հաշվի առնելով տարածքների սահմանի գծի վերականգնումից հետո տարածքների փոխանակում անել, այսինքն՝ սահմանն այստեղ է, բայց կարող են փոփոխություններ լինել։
«Ես կարծում եմ, որ նման հնարավորությունները շատ չեն ու կարող են նոր ռիսկեր բերել։ Մենք պետք է մեր կոմունիկացիաների վերակառուցում անենք, որ ՀՀ բոլոր կոմունիկացիաներն անցնեն ՀՀ տարածքով»,- նշեց նա։
Նա տեղեկացրեց, որ առաջիկայում կլինի Տավուշում։
Մանրամասները՝ տեսանյութում։