Այսօր հայտնի դարձավ, որ ԱԺ «Հայաստան» խմբակցության մի թեւը՝ «Վերաժնվող Հայաստանը» իր թիմով դուրս է գալիս ԱԺ-ից՝ վայր դնելով պատգամավորական մանդատները։
Դեռեւս շաբաթներ առաջ էր ԱԺ խոսնակ Ալեն Սիմոնյանը «գուշակել», որ «Հայաստան» խմբակցությունում մանդատները վայր դնելու որոշումներ են լինելու, ֆրակցիան կազմաքանդվելու է։ Եվ ահա՝ պատգամավորական մանդատները վայր դնելու դիմումները թերեւս արդեն Ալեն Սիմոնյանի աշխատանքային սեղանին են։
«Հայաստան» խմբակցության ղեկավար Սերյան Օհանյանը, օրինակ, կարծում է, որ Վահե Հակոբյանի եւ նրա թիմի հեռանալը բացասական հետեւանքներ չի ունենալու։ MediaHub-ի ճշտող հարցին՝ «Վերածնվող Հայաստանի» հեռանալը չի՞ խարխլում «Հայաստան» դաշինքի հիմքերը, Օհանյանը պատասխանեց․
«Ես կարծում եմ, որ «Հայաստան» դաշինքի եւ ներֆրակցիոն միասնականության վրա դա բացասաբար չի ազդելու։ Մենք պահպանելու ենք միասնականությունը եւ աշխատանքը»։
Ավելի վաղ, Վահե Հակոբյանը մեզ հետ զրույցում ասել էր, որ իր թիմի՝ Ազգային ժողովից հեռանալու պատճառներից մեկն այն է, որ չեն կիսում «Հայաստան» դաշինքի այլ պատգամավորների խորհրդարան վերադառնալու որոշումը։ Հակոբյանը գտնում է, որ ԱԺ նիստերի բոյկոտը շարունակելով՝ ընդդիմադիրները կարող էին հասնել վերջնարդյունքի, այն է՝ խորհրդարանում քաղաքական ճգնաժամի ստեղծումը։ Սեյրան Օհանյանը, արձագանքելով Հակոբյանի այս հայտարարությանն, ընդգծում է՝ նիստերի բոյկոտման հարցը ֆրակցիայում քննարկել են եւ չնայած այս հարցում տարակարծությանը՝ խորհդարանից դուրս շարունակելու են միասին աշխատանքը։
«Մենք մինչեւ հիմա իրար հետ աշխատել ենք՝ պահպանելով ներֆրակցիոն եւ ներդաշինքային գործընկերային նորմերը, հարգելով նաեւ մեր քաղաքական բազմակարծությունը։ Այո, իր հետ քննարկել ենք ԱԺ նիստերը բոյկոտելու հարցը։ Այսօր անհրաժեշտություն կա մեր օրակարգով ԱԺ-ում լինել, ներկայացել ենք։ Բայց ես գտնում եմ, որ միշտ էլ ներկա ենք եղել մեր օրակարգով եւ՛ խորհրդարանում, եւ՛ նաեւ խորհրդարանից դուրս՝ «Դիմադրություն» շարժման շրջանակներում»,-ասաց Օհանյանը:
«Հայաստան» խմբակցության ղեկավարը կարծում է նաև, որ Վահե Հակոբյանի եւ նրա թիմի հեռանալը մեծ աղմուկի հիմք չպետք է հանդիսանա։ «Ես չեմ կարծում, որ դա պետք է մեծ աղմուկի հիմք հանդիսանա, որովհետեւ մենք գործընկերներ ենք եւ այդ հարաբերությունները շարունակելու ենք։ Իրենք մնալու են մեզ ընկեր, մեր թիմակիցներն են, քաղաքական որեւէ տարաձայնություններ չունենք»,- հավաստիացրեց նա։
Լիա Սարգսյան