«Հրապարակ» օրաթերթը գրում է․ Երեկ ԱԺ ՔՊ խմբակցության նիստը տեւել է շատ կարճ։ Ի զարմանս ՔՊ-ականների, խմբակցության ղեկավար Հայկ Կոնջորյանն ասել է, որ Լեւոն Քոչարյանի նկատմամբ ավելորդ էմոցիաներ չցուցադրեն, անգամ՝ անտարբեր, չկարեւորելով նրա անձը։ Եթե կարիք լինի, նրան իր «արժանի» տեղը նստեցնողը կնստեցնի:

Ասվել է, որ մի մարդու պես ներկա լինեն չորեքշաբթի օրվա նիստին՝ բյուջեն է քննարկվելու, եւ Փաշինյանն է գնալու: Անդրադարձ է կատարվել նաեւ առողջապահության պարտադիր ապահովագրության ներդրման թեմային, ասվել է՝ առաջիկայում լսումներ կանեն այս խնդրի շուրջ, որը համարվում է 24 թվի բյուջեի ամենահեղափոխական մասը։

«Իրավունք» թերթը գրում է. «Պարզվում է, որ հանկարծամահ եղած ՔՊ-ական պատգամավոր Մաթեւոս Ասատրյանի հոգեհանգստի արարողությանը ընդդիմությունից մասնակցել է ԱԺ «Հայաստան» խմբակցության քարտուղար Արծվիկ Մինասյանը: Իհարկե, ոմանց համար գուցե այստեղ որեւէ արտառոց բան չկա՝ երկուսն էլ Արագածոտնի մարզից են, գրեթե «զեմլյակ»՝ մեկը Քուչակից, մյուսը՝ Ոսկեթասից: Բայց այստեղ, ամեն դեպքում, մի փոքրիկ խնդիր կա:

Թեպետ հայտնի ասացվածքն ասում է, որ հանգուցյալի մասին կամ լավը պետք է ասել, կամ ոչինչ… բացի իրականությունից, այդուհանդերձ, ընդհանրացնելով հարցը՝ հետաքրքիր է՝ հիմա, ըստ նույն խորհրդարանական թիվ մեկ ընդդիմության՝ ՔՊ-ականներն էլ դավաճան չե՞ն, Նիկոլ Փաշինյանն առանց խորհրդարանի աջակցությա՞ն էր հանձնում Արցախը, ի վերջո, 2018-ից առ այսօր տեղի ունեցածը նորմալ քաղաքական պրոցե՞ս է, երբ աշխատանքային ժամերին իշխանություն-ընդդիմություն կարելի է քննադատել միմյանց, իսկ երեկոյան ընկերություն անել, միմյանց ցավակցել ու մարդկային նորմալ հարաբերություններ պահպանել, ինչպես եղել է այդքան չարչրկված նախկինում: Իսկ եթե դավաճան չեն, ինչպես պնդում էր ընդդիմությունը հրապարակում, այլ նրանց շարքերում նույնիսկ «զեմլյակ»-ներ կային՝ մի՞թե չէր կարելի գտնել ճանապարհ ասելու՝ անուշ ախպեր, արի դու էլ էն պակաս ստորագրությունները լրացրու, վերջապես Փաշինյանի իմպիչմենթի հարց դնենք: Դժվար է, դաժան, բայց պահն անկեղծություն է պահանջում, որ շարքային քաղաքացուց մինչեւ քաղաքական ակտիվիստ իմանան՝ ո՞րն է այն կարմիր գիծը ՔՊ-ականների հետ հարաբերվելուց, գնալ-գալ կարո՞ղ է լինել, որ գոնե իզուր տեղն իրավիճակը սրտներին մոտ չընդունեն ու քրգործերի տակ կքեն՝ իշխանավորների երեսներին շխկացնելով որոշ արտահայտություններ:

Ինչեւէ, հատկանշական է, որ Արծվիկ Մինասյանի այս քայլի մասին ԱԺ «Հայաստան» խմբակցության, մասնավորապես՝ ՀՅԴ-ական պատգամավորներից որեւէ մեկը կարծիք չի հայտնել, թեպետ քառօրյա եւ 44 օրյա պատերազմի մասնակից սփյուռքահայ Հակոբ Պերպէրեանը սոցցանցում ուղիղ հարց է բարձրացրել. «Հարգելի Դաշնակցական ընկերներ, ճի՞շտ է այն տեղեկությունը, որ ընկեր Արծվիկ Մինասյանը մասնակցել է դավաճանի հոգեհանգիստին: Իշխան Սաղաթելյան, Քրիստինե Վարդանյան, Գեղամ Մանուկյան, Գերասիմ Վարդանյան, Գառնիկ Դանիելյան, Արթուր Խաչատրյան, ի՞նչ կասեք դրա մասին»:

Հանուն արդարության՝ հավելենք նաեւ,որ թեպետ Արծվիկ Մինասյանի անունն ավելի շատ շրջանառվեց, սակայն հոգեհանգստին ներկաները պնդում են, որ «Հայաստան» խմբակցության ղեկավարությունից նա միայնակ չի եղել: Ավելին` խմբակցությունում քննարկվում է, թե այսօր մեկնարկող ԱԺ նիստին, որտեղ պետք է տեղի ունենա նաեւ ՀՀ երկրորդ նախագահ Ռոբերտ Քոչարյանի որդու երդմնակալության արարողությունը` որպես նոր մանդատ ստանձնած պատգամավոր, ինչպե՞ս են արդարացնելու իրենց կողմից հոտնկայս մեկ րոպե լռությամբ Մաթեւոս Ասատրյանի հիշատակը հարգելը»:

«Ժողովուրդ» օրաթերթը գրում է. «Ժողովուրդ» օրաթերթի տեղեկություններով՝
Ադրբեջանի՝ Արցախի դեմ սանձազերծած ագրեսիայից հետո բռնի տեղահանված արցախցիներին չի հաջողվում համաձայնության գալ:

Բանն այն է, որ Արցախի պատգամավորները մտադիր են Հայաստանում արտահերթ նիստ հրավիրել, քննարկել իրենց առաջիկա անելիքները եւ համատեղ հայտարարություն տարածել, բայց, այսպես ասած, խոչընդոտները շատ են:

Ինչպես մեր լավատեղյակ աղբյուրներն են փոխանցում, պատգամավորները ԱԺ փոխնախագահ Գագիկ Բաղունցին են փնտրում, որն, ի դեպ, Սամվել Բաբայանի թիմակիցն է, «Միասնական հայրենիք» կուսակցության անդամ:
Բաղունցը դե ֆակտո ԱԺ նախագահ Դավիթ Իշխանյանի ապօրինի գերեվարման պայմաններում նրա պարտականություններն է կատարում, եւ հենց նա պետք է ԱԺ նիստ նախաձեռնի:

Վերջինս, սակայն, անհետացել է, չի պատասխանում պատգամավորների զանգերին, անգամ թիմակիցներին չի հաջողվում կապ հաստատել նրա հետ:

«Ժողովուրդ» օրաթերթը եւս արդեն տեւական ժամանակ է՝ զանգահարում, գրում է նրան, սակայն ապարդյուն. որեւէ արձագանք չկա:
Մեր աղբյուրների փոխանցմամբ՝ բացի սա, անհամաձայնություն կա նաեւ պատգամավորների միջեւ, նրանց էլ չի հաջողվում համախմբվել մեկ օրակարգի շուրջ: Պատգամավորների մի մասն էլ, առհասարակ, ՀՀ տեղափոխվելուց հետո կապի դուրս չի գալիս գործընկերների հետ:
Թվում էր, թե Արցախի կորստից հետո գոնե պետք է թե’ Հայաստանի, թե’ Արցախի պատգամավորներն իրենց սկզբունքներն ու ներանձնային հարցերը մի կողմ դնեին ու հստակ քայլեր ձեռնարկեին, բայց, ինչպես երեւում է, դասեր չեն քաղում եղածից:

«Հրապարակ» օրաթերթը գրում է․ Արցախի նախագահ Սամվել Շահրամանյանն օրերս հանդիպել է ՀՀ առաջին եւ երկրորդ նախագահների` Լեւոն Տեր-Պետրոսյանի եւ Ռոբերտ Քոչարյանի հետ։ Հանդիպումները, բնականաբար, առանձին-առանձին են եղել եւ, ինչպես փոխանցում են, արարողակարգային բնույթի։ Քննարկել են հիմնականում Արցախում մինչեւ սեպտեմբերի 19-ը տիրած վիճակը, մեկօրյա պատերազմը, արցախցիների տարհանման հարցերը, ապագային գրեթե անդրադարձ չի եղել։

Ավելի վաղ գրել էինք, որ Շահրամանյանը Հայաստան գալուց հետո հանդիպել էր նաեւ ՀՀ երրորդ նախագահ Սերժ Սարգսյանի հետ։ Այդ հանդիպումների մասին որեւէ հաղորդագրություն չի տարածվել՝ թերեւս խուսափելով քաղաքական շահարկումներից, մինչդեռ անհայտ ՀԿ-ի ներկայացուցիչների եւ Շահրամանյանի հանդիպման մասին Արցախի տեղեկատվական շտաբը հարկ է համարում տեղեկացնել։

«Իրավունք» թերթը գրում է. «Չար լեզուները խոսում են, որ ՀՀ-ում անվտանգության համակարգերի տեղադրմամբ զբաղվող ընկերությունը, որը նախկինում մերօրյա հեղափոխականները կապում էին Ալեքսանդր Սարգսյանի անվան հետ , այսօր տիրաետում է եւ տնօրինում է ոչ այլ ոք քան ՔՊ-ական երեսփոխան, ՌԴ դեսպանի հավականություններով տոգորված Գուրգեն Արսենյանը:

Ահա թե ինչ կարող է տալ ժամանակին «ճիշտ» կողմնորոշվելը»:

«Փաստ» օրաթերթը գրում է. Ինչպես հայտնի է, այս տարվա օգոստոսի 24-ին և 25-ին Հայաստանում անցկացվեց Եվրասիական միջկառավարական խորհրդի նիստը: Հայաստանյան տեղեկատվական հարթակներում բավական շատ քննարկվեց նիստի անցկացման վայրը: Ենթադրելի է, որ թեմայի նկատմամբ նման ուշադրության պատճառն այն է, որ խոսքը Ծաղկաձորի «Գոլդեն Փելես» հյուրանոցի մասին է, որը պատկանում է գործարար Նարեկ Նալբանդյանին, որին լրատվամիջոցները տևական ժամանակ որակում են որպես իշխանության «սրտի գործարար»։

«Հետքի» մեր գործընկերները հարցում էին ուղարկել ԱԳՆ՝ պարզելու, թե ինչու է ընտրվել հենց այս` պաշտոնապես դեռ չբացված հյուրանոցը: «Հիշատակված միջոցառման վայրի ընտրությունը պայմանավորված էր այն հանգամանքով, որ տվյալ հյուրանոցում առկա են նման մեծամասշտաբ միջոցառում կազմակերպելու համար անհրաժեշտ շենքային պայմաններ՝ նիստերի մեծ դահլիճ, դիմավորման պաշտոնական արարողության համար համապատասխան սրահ, մամուլի կենտրոնի համար համապատասխան տարածք և այն։ Տարածքի անվտանգության ապահովման տեսանկյունից ևս հյուրանոցը գտնվում է բարենպաստ դիրքում»,- պարզաբանել է ԱԳՆ պաշտոնյան։

«Փաստ» թերթի տեղեկություններով, պակաս դեր չի խաղացել նաև ռուսական կողմի նախընտրությունը: Մեր աղբյուրների փոխանցմամբ, բացի շենքային համապատասխան պայմաններից, նիստի անցկացման վայրի ընտրության վրա որոշակի ազդեցություն է ունեցել նաև այն հանգամանքը, որ Ռուսաստանի կառավարության ղեկավար Միխայիլ Միշուստինը և Նարեկ Նալբանդյանը որոշակի կապեր ունեն։