ՔՊ-ական Հասմիկ Հակոբյանն այսօր Նիկոլ Փաշինյանին հարց ուղղեց՝ կապված ընդդիմադիր պատգամավոր Աղվան Վարդանյանի հայտարարության հետ, որում Վարդանյանն ասել է՝ Նիկոլ Փաշինյանին հեռացնելու համար 100 առողջ տղամարդ (մահապարտ) է պետք։
Ի պատասխան՝ Նիկոլ Փաշինյանն ասաց, որ հարցով պետք է դատախազությունը զբաղվի։
«Ինչ վերաբերում է մահապարտներին, ապա պետք է հույս հայտնել, որ այդ մահապարտների ցանկում դասալիքների հատուկ ստորաբաժանում կլինի։ Կարծում եմ՝ ադապտացիայի ճիշտ մեթոդ են գտել։ Ենթադրում եմ, որ այդ ուղղությամբ էլ աշխատանք կանեն։ Իսկ երկրում հետևյալն է տեղի ունենում՝ օրենքի գերակայություն ու օրենքի դիկտատուրա․ դա է մեր նախընտրական թեզը։ Բոլոր նրանք, ովքեր օրենքի գիծը կհատեն, կգտնեն իրենց տեղն այս կյանքում»,- նշեց նա։
Հասմիկ Հակոբյանն անհանգստություն հայտնեց, որ Արցախի հարցի կարգավորումն էլ է Աղվան Վարդանյանը մահապարտների ներգրավմամբ պատկերացնում։
Նիկոլ Փաշինյանն էլ արձագանքեց՝ առաջիկայում ԼՂ հարցի բանակցային գործընթացի վերաբերյալ մանրամասն խոսակցություն է լինելու քննիչ հանձնաժողովում։
«Իրենք են մշակել սկզբունքները, որոնցով ԼՂ-ն ճանաչել են Ադրբեջանի կազմ։ Դրսում ԼՂ-ն Ադրբեջանի մաս են ճանաչել, այստեղ՝ մահապարտ դարձել»,- նշեց նա։
Մանրամասները՝ տեսանյութում։