Մեր հանդիպումները ՀՀ կառավարության ղեկավարի եւ իշխանությունների ներկայացուցիչների հետ հետպատերազմյան տարիներին եղել են արարողակարգային, պետական միջոցառումների շրջանակներում, ինչպես, օրինակ, ՀՀ նախագահի երդմնակալության արարողությանը։ Այս մասին «Հրապարակ”-ին տված հարցազրույցում, պատասխանելով հարցին, թե ինչպիսի՞ հարաբերություններ ունի ՀՀ վարչապետ Նիկոլ Փաշինյանի հետ և ե՞րբ է վերջին անգամ նրա հետ ուղիղ շփում ունեցել ասել է Ամենայն Հայոց Կաթողիկոս Գարեգին Երկրորդը:
Անդրադառնալով հարցին, թե եկեղեցին ու երկրի քաղաքական իշխանությունները միմյանց հետ հաշտ չեն, արդյոք Կաթողիկոսը ջանքեր գործադրել է հարաբերությունները կարգավորելու ուղղությամբ ու ինչ պատասխան է ստացել, Վեհափառն արձագանքել է.
«Ինչպես ասացինք, իշխանությունների եւ Եկեղեցու միջեւ հարաբերություններն արարողակարգային բնույթի են։ Այո՛, իշխանությունների հետ առկա են որոշ տարակարծություններ։ Մայր Աթոռը զանազան առիթներով անդրադարձ ունեցել է այդ խնդիրներին։ Տեղին չենք համարում հիշյալ հարաբերությունները հաշտ կամ հակառակ որակելը։ Եկեղեցին գիտակից է իր կոչմանն ու առաքելությանը՝ իր հավատավոր զավակների նկատմամբ, եւ նախանձախնդրորեն իր կարելի ավանդն է բերում՝ ի խնդիր մեր ժողովրդի բարօր ու անվտանգ կյանքի եւ հայոց պետականության զորացման։ Այս ոգով պետք է ընկալվեն Եկեղեցու կողմից արտահայտվող դիրքորոշումներն ազգային, հասարակական հարցերի առնչությամբ»:
Հարցազրույցն ամբողջությամբ՝ սկզբնաղբյուրում: