Վերջին օրերին ներքաղաքական քննարկման թեմաներից մեկը արդարադատության նախարարի թեկնածուի փնտրտուքի հարցն է: Գրիգոր Մինասյանի հրաժարականը երեկ ընդունվեց, և հիմա նոր նախարարի նշանակման հարցը եկավ առաջին պլան:
Ո՞վ է թեկնածուն: Մամուլը մի քանի անուն է շրջանառում՝ ՔՊ-ական պատգամավոր Արփի Դավոյան, որը հենց ստանձնել էր Մինասյանին հեռացնելու օպերացիան, թեև հասկանալի է, թե այդ նախաձեռնության «շտաբ կվարտիրան» որտեղ է: Շրջանառվում է նաև ՆԳ նախարարի տեղակալ Արփինե Սարգսյանի անունը:
MediaHub-ին այսօր ևս մեկ անուն ասացին, որ քննարկվում է Փաշինյանի աշխատասենյակում, ընդ որում նշվեց, թե այս թեկնածությունը հաստատելու կողմնակիցների թիվը շատ մեծ է ու նաև ՔՊ խմբակցությունում էլ: Սակայն որոշում կայացնողը դանդաղում է, քանզի նման նշանակումը կնեղանցի ոչ միայն գլխավոր դերակատարին՝ Աննա Վարդապետյանին, այլև կնոջը՝ Աննա Հակոբյանին. Այն, որ Աննա Վարդապետյանն ու Փաշինյանի տիկինը մտերիմ են, հայտնի փաստ է:
Իշխանությանը մոտ կանգնած մեր աղբյուրն ասաց, որ քննարկվում է գլխավոր դատախազի պաշտոնը զբաղեցնող Աննա Վարդապետյանին արդարադատության նախարար նշանակելու հարցը, սակայն դա պետք է այնպես արվի, որ Վարդապետյանը չնեղանա, քանզի վերջինիս տեղափոխումը դատախազի պաշտոնից նախարարի պաշտոն, ըստ էության, պաշտոնի իջեցում է: Բայց մյուս կողմից, Աննա Վարդապետյանից մեծ դժգոհություն կա թե՛ համակարգում, թե՛ ՔՊ-ում և նրան այդ պաշտոնին պահելը կարող է դժգոհության լուրջ ալիք բարձրացնել: Հետևապես, իշխանությունն այժմ երկու խնդիր ունի լուծելու՝ Աննա Վարդապետյանին չնեղացնելու, եթե որոշում կայացվի, որ նախարարի պաշտոնին են այդուհանդերձ նշանակելու, կամ զսպելու դժգոհությունները, եթե նրան ձեռք չտան:
MediaHub-ը դիմեց գլխավոր դատախազի խորհրդական Լուսինե Մարտիրոսյանին՝ ճշտելու, թե արդյոք Աննա Վարդապետյանի շուրջ նման քննարկում կա: Վերջինս հերքեց։
«Տիկին Վարդապետյանը նման առաջարկ չի ստացել»,- ասաց նա:
Նշենք նաև, որ այս պահի դրությամբ, այդուհանդերձ, ամենից մեծ շանսերը նշանակվելու արդարադատության նախարար ունի ՆԳ նախարարի տեղակալ Արփինե Սարգսյանը և դրա հիմքում ոչ միայն նրա պրոֆեսիոնալ կարողություններն են, այլև ՆԳ նախարար Վահե Ղազարյանի հետ փոխհարաբերությունների նյուանսները: