Այսօր կայացած ընտրության արդյունքներով Հայաստանի ֆուտբոլի ֆեդերացիայի նախագահ ընտրվեց գործող նախագահ Արմեն Մելիքբեկյանը։ Նրա օգտին քվեարկել էր 23 մասնակցից 20 հոգի, իսկ մրցակից թեկնածու Արաս Օզբիլիսի օգտին՝ 3 հոգի։

Մոտենալով ամբիոնին՝ Մելիքբեկյանն ասաց․ «Ես միայն մի բան եմ ցանկանում ասել՝ կար երեք դեմ ձայն, և շատ կարևոր է հասկանալ, որ չնայած՝ իմ կարծիքով ուռճացված, բայց փաստացի առկա կոնֆլիկտին՝ առնվազն երկու ակումբների հետ: Ես ցանկանում եմ ասել, որ Հայաստանի ֆուտբոլի ֆեդերացիան գալիք ամիսներին, տարիներին, օրերին իմ նախագահության օրոք մշտապես պատրաստ է լինելու համագործակցել բոլոր ակումբների հետ, պահպանել հավասարության սկզբունքները, և ուղղակի մենք կցանկանայինք որոշակի քայլեր տեսնել երկու ակումբների կողմից։ Մնացած բոլոր դեպքերում, եթե կա ցանկություն, ես կարծում եմ, որ մենք կարող ենք լուծել բոլոր խնդիրները և շարունակել համագործակցությունը՝ հանուն հայկական ֆուտբոլի»։

Նա նաև շնորհակալություն հայտնեց Արաս Օզբիլիսին և հնչած քննադատությունների համար։ «Ես շնորհակալություն եմ հայտնում Արաս Օզբիլիսին, ես շնորհակալություն եմ հայտնում այս ընթացքում մամուլում և այլուր տարբեր մարդկանց կողմից հնչած քննադատության համար, որը կառուցողական էր»,- ասաց նա՝ նշելով, որ եթե որևէ ակումբի ղեկավար ցանկություն չունի աշխատել իր հետ, կան բազմաթիվ մեխանզիմներ իրենց ձայնը լսելի դարձնելու համար։

Մանրամասն՝ տեսանյութում