Նիկոլ Փաշինյանի հետ «Հայկական ժամանակ» օրաթերթը ղեկավարած, ապա 2018-ից հետո երեք տարով պատգամավոր դարձած ու 2021-ի ընտրություններից հետո քաղաքականությունից դուրս եկած Հայկ Գևորգյանին այսօր հանդիպեցինք «Հայաստանի էներգետիկայի բնագավառի ներկան և ապագան» խորագրով համաժողովին։ 

ՔՊ-ի նախընտրական ցուցակի վերջին համարներում ընդգրկված ու նորից մանդատ չստացած Գևորգյանը վաղուց լրատվամիջոցների հետ չէր խոսել, մամուլի էջերում չէր հայտնվել, ուստի Mediahub-ն այսօր հետաքրքրվեց նրանից՝ ինչո՞վ է զբաղվում հիմա, արդյոք թիմի հետ իր կապերը պահո՞ւմ է, կիսո՞ւմ է Նիկոլ Փաշինյանի ու նրա թիմի գաղափարները ու ինչ կարող է ասել Արցախի հանձնման մասին։ Գևորգյանն ասաց, որ ինքը հիմա մասնավոր սեկտորում է, աշխատում է գյուղատնտեսական ոլորտում՝ որպես գլխավոր ինժեներ, սեփականատեր չէ, վարձու աշխատող է, ու թեև քաղաքականությունից դուրս է եկել, բայց ասաց՝ թիմից դուրս չի եկել։ 

«Ես թիմից դուրս չեմ եկել, թիմի անդամ եմ, ՔՊ անդամ չեմ, բայց թիմի անդամ եմ»,- ասաց նա՝ նշելով, որ թիմի անդամ լինելը արտահայտվում է թիմի գաղափարները կիսելով։ 

Նրա խոսքով՝ Ազգային ժողովում աշխատանքը շատ ավելի ծանր է, քան այնտեղ, որտեղ հիմա աշխատում է, ու կարծում է, որ այստեղ ինքն իր կյանքն ավելի է բարելավել, քան ՔՊ-ական պատգամավորները։ Նաև ասաց, որ Նիկոլ Փաշինյանի հետ հիմա էլ ունի լավ հարաբերություններ։

«Ինչպես նախկինում, էնպես էլ հիմա նա ոչ միայն իմ ընկերն է, այլ, կարելի է ասել, քաղաքական առաջնորդը»,- ասաց Փաշինյանի հավատարիմ մարդը համարվող Հայկ Գևորգյանը։ 

Նրան նաև հարցրինք՝ կիսո՞ւմ է Նիկոլ Փաշինյանի գաղափարները Արցախի մասով, օրինակ այն, որ ինքը Արցախը ճանաչում էր Ադրբեջանի մաս։ Գևորգյանը, չլինելով ՔՊ անդամ, իր պատասխաններով այստեղ ևս ոչ մի բանով չտարբերվեց այն ՔՊ-ականներից կամ «նիկոլականներից», որոնք անվերապահ կրկնում են Նիկոլ Փաշինյանի հակաարցախյան թեզերը։ 

«Իսկ դուք հաշվարկել եք՝ ճի՞շտ էր դա, թե՞ սխալ»,- ասաց նա՝ նկատի ունենալով Արցախը Ադրբեջանի մաս ճանաչելը։ Ասացինք, որ մեզ փոքր տարիքից թե՛ տանը, թե՛ դպրոցում սովորեցրել են, որ հայրենիքի հանդեպ պետք է անվերապահ սեր և հոգատարություն ցուցաբերել, հայրենիքը չպետք է հանձնել կամ չխպետք է հայրենիքը դավաճանել։ «Իսկ հանձնե՞լ են, թե՞ գրավել են»,-հարցրեց նա՝ կրկնելով նախկիններին վերաբերող «հին երգը», որ 20 տարի Ադրբեջանը զինվում էր, իսկ մենք իբրև թե ոչինչ չէինք անում, մեր ուժերի բալանսը խախտված էր, Ադրբեջանը մեզնից մի քանի անգամ հզոր էր և այսպես շարունակ։ Նշեց նաև, թե Ադրբեջանը, միևնույն է, հարձակվելու էր մեզ վրա։ Ըստ նրա՝ մեզ իրավիճակն է ստիպել՝ Արցախը ճանաչել Ադրբեջանի մաս։ 

«Դուք պատրա՞ստ եք չճանաչել Արցախը Ադրբեջանի կազմում ու գնալ հարատև պատերազմի։ Պատրա՞ստ եք դրան»,-նշեց Փաշինյանին իր քաղաքական առաջնորդը համարող ոչ ՔՊ-ականը։ Ի դեպ, Գևորգյանը նաև մի նոր՝ «վերնիկոլական» բացատրություն տվեց Նիկոլ Փաշինյանի՝ Ստեփանակերտի հրապարակում 2019-ին արած այն հայտարարությանը, թե «Արցախը Հայաստան է և վերջ»։ Գևորգյանի տրամաբանությամբ՝ նրա այդ հայտարարությունը կոռուպցիայի հետ կապված էր։

«Ինչի՞ հետ կապված էր ինքը դա ասում, օրինակ՝ Արցախում առկա կոռուպցիայի։ Խնդրում եմ՝ գնացեք, ամբողջ ելույթը լսեք, հասեք էդ հատվածին ու տեսեք՝ դրան ի՞նչ է նախորդում»,- ասաց Գևորգյանն ու չցանկացավ այլևս թեման շարունակել։

Մանրամասն՝ տեսանյութում

Վահե Մակարյան