Ճապոնիան մտադիր է նոր սերնդի ատոմակայաններ կառուցել՝ մինչեւ 2050 թ. ածխածնի արտանետումները զրոյի հասցնելու համար։ Համապատասխան նախագիծը կհանձնարարվի պատրաստել վարչապետ Ֆումիո Կիսիդան օգոստոսի 24-ին կայանալիք կառավարության նիստին, հայտնում է Nikkei-ն՝ վկայակոչելով աղբյուրները։
Դա կօգնի խուսափել էլեկտրաէներգիայի դեֆիցիտի վտանգից եւ ավելացնել դրա արտադրությունը։ 2023 թ. ամառվանից Ճապոնիայի իշխանությունները ցանկանում են վերագործարկել 17 ատոմակայան։ Նոր ատոմակայանների կառուցումը նախատեսված է 2030-ին։ Հաջորդ սերնդի կայաններն ավելի անվտանգ ռեակտորներ կունենան:
2011-ին «Ֆուկուսիմա» ատոմակայանում տեղի ունեցած վթարից հետո Ճապոնիայում նոր կայանների կառուցումը փաստացի արգելվեց։ Այնուամենայնիվ, Կիսիդայի նախագիծը կարող է շրջադարձային դառնալ երկրի ամբողջ էներգետիկ ոլորտի համար։ Նոր ատոմակայանների կառուցման ծրագրից բացի, Կիսիդան կառաջարկի նաեւ երկարացնել գործող ատոմակայանների եւ առանձին ռեակտորների կյանքը։
Օգոստոսի 22-ին Wall Street Journal-ը հայտնել էր հեղուկ բնական վառելիքի համար եվրոպական եւ ասիական երկրների միջեւ մրցակցության աճի մասին: Հարավային Կորեայում եւ Ճապոնիայում ՀԲԳ-ի պահանջարկը վերջին շրջանում շոգի պատճառով կտրուկ աճել է:
Ամռանը սփոթային շուկայում հեղուկացված բնական գազի գներն այնքան բարձրացան, որ տարածաշրջանի ոչ բոլոր ասիական երկրները կարող են իրենց թույլ տալ էներգիա գնել։ Ճապոնական բորսայում ՀԲԳ-ի արժեքը օգոստոսի կեսերին գրեթե 60 դոլարի էր հասել՝ 1 միլիոն BTU-ի դիմաց, ինչը 12 անգամ գերազանցում է մինչեւ 2019 թ. ամառային միջին գինը։