Այսօր՝ օգոստոսի 16-ին, խոշոր հրդեհ է տեղի ունեցել Գեղարքունիքի մարզում։ Ժամը 21։15-ի սահմաններում ՀՀ Ներքին գործերի նախարարության Փրկարար ծառայության 9-11 Ճգնաժամային կառավարման ազգային կենտրոն ահազանգ է ստացվել, որ Գավառ քաղաքի Հացառատ թաղամասից դեպի Գանձակ գյուղ տանող ավտոճանապարհին տան տանիք է այրվում։

Ինչպես հայտնում է ֆոտոլրագրող Գագիկ Շամշյանը, դեպքի վայր են ժամանել մարզային փրկարարական վարչության հրշեջ-փրկարարական ջոկատից 3 մարտական հաշվարկ։

Տեղում հայտարարվել է հրդեհի բարդության «Թիվ 2» աստիճան։

Լրացուցիչ ժամանել են մարզային փրկարարական վարչության օպերատիվ խումբն ու հրշեջ-փրկարարական ջոկատից ևս 1 մարտական հաշվարկ։

Ծուխն ու կրակը տեսանելի են մի քանի հարյուր մետր հեռավորությունից։

Ըստ նախնական տեղեկությունների՝ բարեբախտաբար տուժածներ չկան։

Հրդեհը բռնկվել է ավտոտեխսպասարկման բազմաֆունկցիոնալ սրահի ավտոտնակ-պահեստներից մեկում։

Ոստիկանության Գավառի բաժնում պարզվում են ավտոտեխսպասարկման կենտրոնի սեփականատիրոջ ինքնությունը և ինչ հանգամանքներում է կրակն առաջացել։