Ամանոր նշելու պատեհ շրջան չի վիճակվել, ցավոք․ MediaHub-ի հետ զրույցում ասում է Պետական վերահոսկողության ծառայության պետ Ռոմանոս Պետրոսյանը՝ ի պատասխան հարցին՝ որտե՞ղ եւ ի՞նչ միջավայրում է նշելու Նոր տարին։
Ռոմանոս Պետրոսյանի համար 2020 եւ 2021 թվականները, այսպես ասած, պաշտոնառատ տարիներ էին։ Կոտայքի նախկին մարզպետը 2020թ․-ին նշանակվեց ՀՀ շրջակա միջավայրի նախարար, իսկ մեկ տարի անց՝ Պետական վերահոսկողության ծառայության պետ։
Հետաքրքրվեցինք՝ 2023թ-ին պետական կառավարման համակարգում ի՞նչ նոր պաշտոն է ակնկալում Ձմեռ պապից։
«Պաշտոնի առհասարակ չեմ ձգտել ու չեմ տենչում ի սկզբանե։ Բոլորիս ուշքն ու միտքը Լաչինի միջանցքն է, որպեսզի օր առաջ հանգուցալուծում տրվի ստեղծված իրավիճակին»,-ասաց նա։
Գալիք տարում Հայաստանին ու հայ հասարակությանը մաղթում է՝ պետական ինստիտուտների կենսունակության բարձրացում եւ Բանակի հզորացում։
«Որպեսզի կարողանանք կառավարել արտաքին անվտանգային մարտահրավերները եւ պատվով պաշտպանենք մեր ինքնիշխանությունն ու տարածքային ամբողջականությունը»,-հավելեց նա։
Լիա Սարգսյան