Իլհամ Ալիևն ամիսներ առաջ իր հարցազրույցներից մեկում ասել էր, թե ոչ միայն Արցախում չպետք է լինեն զինված ուժեր ու անվտանգության ստորաբաժանումներ, այլ նաև Հայաստանը առհասարակ բանակ չպետք է ունենա: 1920 թվականի դեկտեմբերի 2-ին Ալեքսանդրապոլում ստորագրած պայամագրում նման կետ կա, որը վերաբերվում էր հայկական բանակի գրեթե լուծարմանը։

MediaHub.am-ի հետ զրույցում թուրքագետ Ռուբեն Մելքոնյանը մանրամասնեց, որ, ըստ այդ պայմանագրի, Հայաստանը պետք է սահմանափակ թվով ԶՈՒ ունենա, որոնք ոչ թե արտաքին թշնամու դեմ են, այլ ներքին գվարդիա է լինելու։

«Այդ զուգահեռները ես հիմա տեսնում եմ, քանի որ Ալիևն ինքն է նշում, որ և՛ Արցախը, և՛ Հայաստանը ԶՈՒ պետք է չունենան։ Ալեքսանդրապոլի պայմանագրից հետո Թուրքիայի հիմնադիր նախագահը՝ Քեմալ Աթաթուրքը հայտարարել էր, թե Հայաստանի ինչի՞ն է բանակը պետք, Հայաստանն իր զենքերը պետք է տա Թուրքիային։ Թե՛ Ալիևի և թե՛ Աթաթուրքի հայտարարության ընդհանրությունն այն է, որ հայկական բանակը պետք է լուծարվի, որին միտված քայլեր են իրականացվում, թուրքական կողմից պահանջներ են ներկայացվում, ՀՀ-ի ներկայիս իշխանությունների քայլերն են նաև այդ մասին խոսում։ Կարծում եմ՝ ակնհայտ է, որ ՀՀ-ն առանց զինված ուժերի չի կարող երբևէ հույս ունենալ նորից վերականգել իր գործոնները»,-մեկնաբանեց նա։

Թշնամու նման հայտարարությունների ֆոնին հայկական կողմի արձագանքի մասին Մելքոնյանը հատկանշական համարեց այն, որ այս իշխանությունն այդ ամենը ոչ միայն հանգիստ է ընդունում, այլև հոժարական կատարում է այն, ինչ ասվում է իրենց։

«Եվ, ընդհանրապես, մեզ համար վաղուց արդեն զարմանալի չէ, որ այս իշխանությունների համար թիրախ են այն կառույցները, համակարգերը, որոնք թիրախ են Թուրքիայի և Ադրբեջանի համար՝ բանակը, եկեղեցին և այլն»,-ասաց թուրքագետն ու հավելեց, որ Ադրբեջանի և Թուրքիայի համար վտանգ հանդիսացող կառույցներն արդեն չորս տարի է՝ հալածվում են ներկայիս իշխանության կողմից։

 Լիաննա Թորոսյան