Վլադիվոստոկում բժիշկները փրկել են վթարի ենթարկված հղի կնոջ և նրա երեխայի կյանքը՝ շտապ վիրահատություն կատարելով, հայտնում է Պրիմորսկի երկրամասի առողջապահության նախարարությունը, փոխանցում է Ռիա Նովոստին։
Տարածաշրջանային առողջապահության նախարարության տվյալներով՝ վթարը, որից տուժել է հղի կինը, տեղի է ունեցել Արտեմ քաղաքի մոտ։ Կնոջը տեղափոխել են Վլադիվոստոկի հիվանդանոց, ուր գնացել են նաև մանկաբարձ-գինեկոլոգները և մանկական հիվանդանոցի նեոնատոլոգները։ Հիվանդի մոտ ախտորոշվել է ուղեղի ցնցում, ողնաշարի և կողոսկրերի կոտրվածքներ։ Ուլտրաձայնային հետազոտությունը հայտնաբերել է որովայնի խոռոչում հեղուկի կուտակում և փայծաղի հնարավոր պատռվածք։
«Պրիմորյեի բժիշկների ջանքերի շնորհիվ փրկվել է թե՛ մայրիկի, թե՛ նորածնի կյանքը... Վիրաբույժների և մանկաբարձ-գինեկոլոգների թիմերը համատեղ վիրահատություն են կատարել, արդյունքում՝ ծնվել է 1940 գրամ կշռող աղջիկ երեխա... Երիտասարդ մայրը նույնպես հաջողությամբ վիրահատվել է, դադարեցվել է արյունահոսությունը»,- ասվում է Պրիմորսկի առողջապահության նախարարության տելեգրամյան ալիքի հրապարակման մեջ։
33 շաբաթական ծնված աղջիկը հիվանդանոցում «կքաշ կհավաքի և անհրաժեշտ բուժում կստանա»։ Նրա մորն արդեն վերակենդանացման բաժանմունքից տեղափոխել են վիրաբուժական բաժանմունք։ Հիվանդի կյանքին վտանգ չի սպառնում, նշել են մարզային առողջապահության նախարարությունից։