ԱՄՆ կառավարությունը հաջորդ տասնամյակում ավելի քան 500 միլիարդ դոլար կծախսի կլիմայական տեխնոլոգիաների եւ մաքուր էներգիայի վրա՝ համաձայն վերջերս ընդունված երեք օրենքների, ցույց է տվել RMI հասարակական կազմակերպության վերլուծությունը, հայտնում է Reuters-ը:
Ըստ գնահատականների՝ 514 միլիարդ դոլար ընդհանուր գումարը ներառում է 362 միլիարդ դոլար՝ գնաճի նվազեցման մասին օրենքից, 98 միլիարդ դոլար՝ ենթակառուցվածքի մասին օրենքից եւ 54 միլիարդ դոլար՝ CHIPS օրենքից: Վերլուծությունը չի ներառում հողի հետ կապված գյուղատնտեսական եւ կլիմայական լրացուցիչ ծախսերը:
Հետազոտության մեջ ասվում է, որ կլիմայի եւ մաքուր էներգիայի վրա տարեկան դաշնային ծախսերը մոտ 15 անգամ ավելի կլինեն, քան 1990-ականներին եւ 2000-ականների սկզբին, եւ մոտ երեք անգամ ավելի, քան վերջին տարիներին:
ԱՄՆ կառավարության գնահատմամբ՝ վերականգնվող էներգիան դառնում է արտադրության ավելի ու ավելի մեծ մասը:
Սակայն հետազոտության հեղինակներն ասել են, որ կլիմայի փոփոխության դեմ պայքարի գործողությունները պետք է արագացվեն: