Կառավարության հերթական նիստում այսօր՝ հունիսի 7-ին, գործադիրը հավանության արժանացրեց «Զինվորական ծառայության և զինծառայողի կարգավիճակի մասին» օրենքում լրացումներ կատարելու մասին» օրենքի նախագիծը, ըստ որի՝ ԲՈւՀ-երում վերականգնվում է զորակոչից տարեկետման իրավունքը։ Տվյալի առնչությամբ MediaHub.am-ը զրուցեց ՍԴ աշխատակազմի նախկին ղեկավար Էդգար Ղազարյանի հետ։
«Կարծում եմ՝ առավել քան ակնհայտ է, որ նման որոշումները տանում են բանակի թվաքանակի կրճատման։ Նախկինում այդ տարկետման համար սահմանափակումներ էին դրվել և այդ հնարավորությունը տրվում էր միայն անվճար համակարգ ընդունված արական սեռի քաղաքացիներին, նույնիսկ պետական բուհի վճարովի համակարգ ընդունվածները չէին օգտվում այդ իրավունքից և դա պայմանավորված էր վերջին շրջանի դեմոգրաֆիական ցուցանիշներով, այսինքն՝ 18 տարեկան տղաների պակասով, ինչն ուղղակիորեն անդրադառնում է բանակի թվաքանակի վրա, այսինքն՝ որպեսզի զորակոչային ռեսուրսը պահպանվի, կամ պետք է պայմանագրային ծառայողների քանակն ավելացվի, ինչը պետությունից հավելյալ մեծ ծախսեր է պահանջում, կամ սահմանափակումներ դրվեն բանակի արտոնությունների, այդ թվում՝ ուսման նպատակով տարկետման վրա, որպեսզի թվաքանակը պահպանվի, իսկ հիմա կառավարությունը հետևողականորեն կործանում է մեր բանակը, կրճատում դրա թվակազմը և այդ գործիքը նորից կիրառում է ոչ թե կրթության խրախուսման համար, այլ բանակի թվաքանակը կրճատելու նպատակով»,- ասաց Ղազարյանը։
Ըստ նրա՝ 18 տարին լրացած այն քաղաքացիները, ովքեր պետք է գնային բանակ և համալրեին զինված ուժերը, պարզապես չեն գնա բանակ:
«Իրենց կտրվեն այդ արտոնությունները, կառավարությունն էլ կտա համապատասխան կարգավորումները, երիտասարդները կազատվեն պարտադիր զինվորական ծառայությունից։ Եթե այս որոշումը համադրում ենք կառավարության մյուս համապատասխան որոշումների հետ, հասկանում ենք, որ իշխանությունների նպատակը՝ բանակը կազմաքանդելն է»,- ասաց Էդգար Ղազարյանը։
Վերջինս հիշեցրեց՝ 2022 թվականի ամառային զորակոչն ու զորացրումը ավարտին է մոտենում, որով, Արցախի Պաշտպանության բանակից տեղի է ունենում միայն զորացրում և զորքերի համալրում ժամկետային զինծառայողներով տեղի չի ունենում։
«Իսկ Արցախի Պաշտպանության բանակը մեր երկու պետությունների ԶՈՒ-երի ամենամեծ թվակազմով ռազմական ստորաբաժանումն է։ Եթե հիմա լուծարում են Պաշտպանության բանակը և զուգահեռ փոքրացնում են հայկական բանակի թվաքանակը, ապա այդ որոշումները դրան են միտված։ Դրան զուգահեռ, տեղի է ունենում հակառակ գործընթացն Ադրբեջանում։ Ալիևն իր վերջին հայտարարություններում նշեց՝ Ադրբեջանը համալրում է զորքի թվաքանակը, ինչպես նաև՝ տարբեր զինատեսակները, պայմանագրեր են կնքվել նաև նոր տեսակի զինտեխնիկա ձեռք բերելու ուղղությամբ։ Ստացվում է՝ Ադրբեջանում ընթանում է հակառակ գործընթացը, իսկ ՀՀ-ում ընդհանրապես սպառազինությունների ձեռքբերման վերաբերյալ որևէ տեղեկություն չկա։ Ադրբեջանը նոր պատերազմին պատրաստվում է մեծ ուժով, իսկ ՀՀ-ում ընթանում է ճիշտ հակառակ գործընթացը»,- հայտարարեց Ղազարյանը։
Մերի Գևորգյան