Որքան հպարտությամբ կարելի է խոսել պատմությունը, մշակույթն ու գրականությունը կերտողների մասին, նույնքան պարտադիր է նշել նրանց անցած ճանապարհի, թողած ժառանգության ու ազդեցության մասին։

Տարեվերջին MediaHub-ը հիշում է բոլոր նրանց, ում կորցրեցինք 2022 թվականին:

2022 թվականի հունվարի 1-ին մահացել է Ազգային անվտանգության ծառայության Պետական պահպանության ծառայության նախկին պետ Գրիգորի Հայրապետովը։ Վերջինս մահացել է «Երազ» թաղամասի իր բնակարանում։ Նշենք նաև, որ Հայրապետովը միակ մարդն էր, որ ներկա էր Փաշինյան-Ալիև վերելակային հանդիպմանը։ 

Հունվարի 11-ին 82 տարեկանում կյանքից հեռացել է բանաստեղծ Ռազմիկ Դավոյանը։ 1994-1996 թվականներին եղել է Հայաստանի Գրողների միության վարչության նախագահ: Վերջինս հեղինակել է «Ստվերների միջով», «Ռեքվիեմ», «Խաչերի ջարդը», «Մեղրահաց», «Բանաստեղծություններ» և այլ ժողովածուներ:

Հաջորդ կորուստը փետրվարի 4-ին էր՝ 63 տարեկանում կյանքից հեռացավ սիրված կոմպոզիտոր, երգահան, ՀՀ ժողովրդական արտիստ Արթուր Գրիգորյանը: Կոմպոզիտորը 1994 թվականից հիմնադրել է Հայաստանի Երգի պետական թատրոնը։ Հեղինակել է բազմաթիվ երգեր, մանկական մյուզիքլներ, մասսայական միջոցառումներ, փառատոններ, թեմատիկ և էստրադային համերգներ։ Նրա կորուստն իսկապես ծանր հարված է...

Մարտի 10-ին 76 տարեկանում կյանքից հեռացավ գրող, հրապարակախոս, արձակագիր, հասարակական–քաղաքական գործիչ Ալվարդ Պետրոսյանը։ Արժանացել է ՀՀ ՊՆ «Մարշալ Բաղրամյան» մեդալին, տարբեր գրական մրցանակների, պատվո շքանշանի: Ալվարդ Պետրոսյանը ՀՀ մշակույթի վաստակավոր գործիչ էր:

Մայիսի 9-ին դժբախտ պատահարի հետևանքով 31 տարեկանում մահացել է հաղորդավարուհի Արմինե Ճաղարյանը։ Վերջինս «Շանթ» հեռուստաընկերությամբ հեռարձակվող «Ճամպրուկս ու ես» հաղորդման հեղինակն է։

Հունիսի 13-ին 79 տարեկանում մահացել է կինոյի և թատրոնի դերասան, ՀՀ վաստակավոր և ժողովրդական արտիստ, ՀԽՍՀ վաստակավոր արտիստ Ռաֆայել Քոթանջյանը։ Վերջինս հայտնի է «Հայֆիլմի» նկարահանած «Քաոս», «Տղամարդիկ», ինչպես նաև «Մոսֆիլմում» նկարահանված «Երեքի սրտերը», «Զվարճալի ուղևորություն» և այլ ֆիլմերում իր անմոռանալի դերերով։

Հուլիսի 13-ին 55 տարեկանում մահացել է գեներալ, ԱԺ նախկին պատգամավոր Սեյրան Սարոյանը։ Գեներալն ակտիվ մասնակցություն է ունեցել Ղարաբաղյան շարժմանը։ Նրա հրամանատարությամբ գործող ջոկատը՝ «Արծվիկ-10» գումարտակը, մարտնչել է Քարվաճառի, Քաշաթաղի, Կովսականի ազատագրման ճակատամարտերում։

Հուլիսի 15-ին դատարանի դահլիճում 57 տարեկանում մահացել է պրոդյուսեր Արմեն Գրիգորյանը։ Վերջինս հանրությանը հայտնի էր ուրախների և հնարամիտների «ԵրՄԻ» թիմում իր ելույթներով և Ռուսաստանում պրոդյուսերական գործունեությամբ։

Հոկտեմբերի 27-ին 48 տարեկանում մահացել է սիրված լրագրող, հեռուստահաղորդավար Գայանե Փայտյանը։ Հայկական Երկրորդ հեռուստաալիքով հեղինակել և վարել է «Կախման կետեր», ինչպես նաև «Զրույց Փայտյանի հետ» հաղորդաշարերը։

Դեկտեմբերի 18-ին 74 տարեկանում երկարատև հիվանդությունից հետո կյանքից հեռացավ ՀՀ ԱԺ նախկին նախագահ Գալուստ Սահակյանը։ Վերջինս եղել է ՀՀԿ գործադիր մարմնի և ՀՀԿ խորհրդի անդամ, ՀՀԿ նախագահի տեղակալ։

Շուշանիկ Միսկարյան