Հարավային Կորեայում աշխարհի առաջին լողացող քաղաքը կկառուցեն

Ծովի մակարդակի գլոբալ բարձրացման հետ կապված մտահոգություններն աճում են, ուստի ջրի վրա կլիմայի փոփոխությունների հանդեպ դիմացկուն քաղաքներ կառուցելու գաղափարը թափ է հավաքում: UN-Habitat-ը, Bjarke Ingels Group-ը, SAMOO-ն (Samsung Group), Oceanix-ը եւ այլ ընկերություններ համախմբել են իրենց ուժերը Հարավային Կորեայում առաջին լողացող քաղաքը կառուցելու համար, տեղեկացնում է «Տեխկուլտը»:

Ծրագիրը ներկայացվել է դեռեւս 2019 թվականին, դրանից հետո այն միայն զարգացել է։ Նախագիծը ստացել է Oceanix Busan անվանումը, քանի որ ծրագրվել է կառուցել հարավկորեական Բուսանի ափերի մոտ: Դրանք կլինեն մայրցամաքի հետ կապված երեք հսկայական լողացող հարթակներ, որոնց վրա կկառուցվեն բնակելի շենքեր, հանրային տարածքներ՝ ռեստորաններով, եւ գիտական գոտիներ։ Ի դեպ, նախագիծը կարող է ընդլայնվել մինչեւ 20 կղզիներ՝ շատ ավելի մեծ տարածքով:

Սա կլինի ջրի վրա կայուն համայնքի առաջին նախատիպը: Միմյանց միացած ընդհանուր 6,3 հեկտար տարածքի վրա կտեղավորվի 12 000 բնակիչ, յուրաքանչյուր շրջանը ընդհանուր օգտագործման 30 000-40 000 ք/մ  տարածք կունենա: Լողացող հարթակները մայրցամաքի հետ կմիանան կամուրջներով՝ հանգստի, ստեղծագործական գործունեության եւ համերգների համար նախատեսված տարածքներով:

Շենքերը կկառուցվեն էկոլոգիապես մաքուր նյութերից, այդ թվում՝ փայտից, եւ դասավորված կլինեն հատուկ եղանակով՝ բնական օդափոխություն ապահովելու համար

Նախագծի իրականացման մեկնարկը նախատեսված է 2023 թվականին։ Oceanix-ը երաշխավորում է, որ շինարարության առաջին փուլը կավարտվի մինչեւ 2027 թվականը։

Համայնքին էլեկտրաէներգիա կմատակարարվի արեւային մարտկոցներից, ջերմոցներում սնունդ կաճեցվի, ջրի սպառումը կհասցվի նվազագույնի։