Զոհված զինծառայող Ժորա Մարտիրոսյանի մոր՝ Գայանե Հակոբյանի պաշտպաններ Հովսեփ Սարգսյանն ու Գեորգի Մելիքյանն այլևս չեն զբաղվելու տիկին Գայանեի պաշտպանությամբ, քանի որ կողմերի դիրքորոշումների միջև փոփոխություն է առաջացել։ Եվ այդ փոփոխությունն, ըստ պաշտպանների, այս դատական նիստի ընթացքում է տեսանելի դարձել։
«Մենք միջնորդություն էինք ներկայացրել, որ տիկին Գայանեի խափանման միջոց կալանքը փոխարինվի չհեռանալու մասին ստորագրությամբ։ Մենք շարունակում ենք պնդել, որ տիկին Գայանեի քայլերում հանցակազմ չկա»,- ասաց պատպան Հովսեփ Սարգսյանը։
Սակայն նա հրաժարվեց ասել, թե այդ դեպքում տիկին Գայանեն ինչ դիրքորոշում է հայտնել, այսինքն՝ չմեկնաբանեց, թե զոհվածի մայրն ի՞նչ է կարծում՝ հանցակազմ կա ու ինքը չպե՞տք է ազատ արձակվի։
«Նիստը դռնփակ էր, ուստի իրավունք չունենք տիկին Գայանեի դիրքորոշման վերաբերյալ հանրային ձևով արտահայտվելու»,- ասաց նա։
Նա տեղեկացրեց, որ հակասություններ են առաջացել փաստաբանական թիմի ու պաշտպանյալի դիրքորոշումների միջև, և իրենք նման որոշման են հանգել, որ պետք է դադարեցվի այս թիմի կողմից Գայանե Հակոբյանի պաշտպանությունը։
Նշենք, որ դատական նիստը կես ժամով ընդհատվել է, որ հնարավոր լինի հանրային պաշտպան ներգրավել գործում։
Հովսեփ Սարգսյանը տեղեկացրեց, որ Գայանե Հակոբյանի նկատմամբ կիրառված խափանման միջոցը փոխելու վերաբերյալ իրենց ներկայացրած միջնորդությունը դեռևս չի քննարկել դատարանը, բայց այն, ըստ դատավորի, անպայման քննարկվելու է։
«Մեր համար Գայանե Մարտիրոսյանի ազատությունը շատ կարևոր է»,- ասաց նա։
Հարցին, թե արդյո՞ք Աշոտ Փաշինյանի դիրքորոշման մեջ էլ փոփոխություն կար, Հովսեփ Սարգսյանը պատասխանեց՝ այո՛։
«Փոփոխություն կար, բայց դրա մասին հիմա եկեք չխոսենք, քանի որ դռնփակ նիստ էր։ Նրա դիրքորոշումը համընկնում էր Գայանե Հակոբյանի ազատության հետ կապված մեր դիրքորոշմանը։ Այսինքն՝ Աշոտ Փաշինյանը փոխել է խափանման միջոցի վերաբերյալ իր դիրքորոշումը»,- նշեց նա։
Մանրամասն՝ տեսանյութում