Արցախի խորհրդարանի քաղաքական բոլոր ուժերի նախաձեռնությամբ՝ հոկտեմբերի 30-ին՝ ժամը 15:00-ին, տեղի կունենա Ազգային ժողովի արտահերթ նիստ և հանրահավաք՝ նվիրված Արցախի արժանապատիվ ու անվտանգ ապագային:

Արցախցի թե' իշխանական և թե' ընդդիմադիր պատգամավորները երեկ հայտարարել էին, որ Արցախի համար ընդունելի են Հայաստան - Ադրբեջան խաղաղության պայմանագրի շուրջ Ռուսաստանի առաջարկները։ Պատգամավորները մանրամասնել էին, որ ռուսական կողմի առաջարկած փաստաղթղթի 15-րդ կետում հստակ նշվում է, որ կա Արցախի հարց, որը հետագայում պետք է լուծվի բանակացությունների միջոցով։ Այսինքն՝ խնդրի կարգավորումը սառեցվում է։ Մինչդեռ ամերիկյան փաստաթուղթը մեկընդմիշտ փակում է Արցախի հարցը և արցախցիներին դիտարկում է որպես Ադրբեջանում բնակվող էթնիկ փոքրամասնություն։

Այս հայտարարությունների համատեքստում գրեթե ակնհայտ է, թե ինչ ուղղվածություն են ունենալու Արցախի ԱԺ նիստն ու Ստեփանակերտի հանրահավաքը, մանավանդ, որ դրանք նախորդում են Պուտին- Փաշինյան- Ալիև եռակողմ բանակցություններին:

Հանրահավաքի ուղերձները երկշերտ են՝ ուղղված միջազգային հանրությանն ու Հայաստանի իշխանություններին:
Միջազգային հանրության հնարավոր արձագանքը դժվար է գերագնահատելը, մանավանդ, որ Արցախի նվազ սուբեկտությունն այս առումով լավատեսության հիմքեր չի ստեղծում: Պաշտոնական Ստեփանակերտը, Արցախի հասարակությունը միջազգային հանրությանն իրենց մեսիջները կարող են հասցնել միայն Հայաստանի իշխանությունների միջոցով:

Այստեղ էլ առաջանում են այլ խնդիրներ:

Արդյո՞ք հոկտեմբերի 30-ի հանրահավաքն ավելի է մեծացնելու պաշտոնական Երևանի ու Ստեփանակերտի խզումը՝ ներքաղաքական լարվածության հիմքեր առաջացնելով Հայաստանում, թե՞ Ստեփանակերտի հանրահավաքը կարող է վերանայումներ առաջացնել Հայաստանի իշխանության քաղաքականության մեջ:

Այս հարցերի պատասխաններից են կախված, թե ներքաղաքական ինչ զարգացումներ տեղի կունենան Հայաստանում՝ անվտանգային ահագնացող ռիսկերի համատեքստում:

Վահրամ Բագրատյան