Ուկրաինայում ռազմական գործողությունները շարունակվում են արդեն 117 օր։ Ուկրաինական կողմից հաստատել են, որ ռուսական ուժերը գրավել են Սևեռոդոնեցկի մոտ գտնվող Մետելկինո բնակավայրը, ինչի մասին ավելի վաղ հայտնել էր ՌԴ պաշտպանության նախարարությունը։ Ուկրաինայի զինված ուժերի գլխավոր շտաբը առավոտյան տեղեկագրում հայտնել է, որ երկրի արևելքում և հարավում, որտեղ ինտենսիվ ռազմական գործողություններ են ընթանում, ռուսական ուժերն ակտիվորեն օգտագործում են ավիացիան և հրետանին։
Խարկովի ուղղությամբ ռուսական զորքերը հիմնական ջանքերը կենտրոնացրել են այն բանի վրա, ոպեսզի թույլ չտան ուկրաինական ուժերին առաջ շարժվել դեպի երկրի պետական սահման։
Դոնեցկի ուղղությամբ ռուսական ուժերը կենտրոնացած են Սևեռոդոնեցկի և Բախմուտի վրա։ Այդ ուղղություններում հարվածներ են հասցվել տասնյակ բնակավայրերի։
«Բախմուտի ուղղությամբ հակառակորդը հարվածներ է հասցրել հրետանուց և նռնականետներից։ Լիմանի ուղղությամբ ռուսական ուժերը ավիահարվածներ են հասցրել երկու Սու-25 ինքնաթիռներով։ Ավդեևկայի ուղղությամբ հակառակորդը Սու-25 ինքնաթիռով հարվածել է Շևչենկոյին և Ուգլեդարին։ Սևեռոդոնեցկ քաղաքի վերահսկողության համար մարտերը շարունակվում են», – հայտնել է Ուկրաինայի ԶՈՒ ԳՇ խոսնակ Ալեքսանդր Շտուպունը։
Սևեռոդոնեցկի «Ազոտ» քիմիական գործարանի տարածքի մի մասը գտնվում է Ուկրաինայի զինված ուժերի վերահսկողության տակ։ Գործարանի բունկերներում խաղաղ բնակիչներ են պատսպարված։ Ըստ Լուգանսկի մարզի ղեկավար Սերգեյ Գայդայի՝ գործարանի տարածքում 568 քաղաքացիական անձ է գտնվում, այդ թվում՝ 38 երեխա, սակայն նրանք հրաժարվել են տարհանվել։
Իսկ Լուգանսկի Ժողովրդական Հանրապետության միլիցիայի աղբյուրը ՏԱՍՍ գործակալությանը հայտնել է, որ ուկրաինացի զինվորականների հետ «Ազոտ» գործարանում գտնվող օտարերկրյա վարձկաններն արգելափակում են բանակցային գործընթացը, կիրակի օրը տեղի ունեցած բանակցություններն արդյունք չեն տվել։