Ռոսպոտրեբնադզորը շրջանառությունից հանել է Հայաստանում գրանցված կենսաբանական ակտիվ հավելումների ավելի քան 118000 փաթեթ, որոնք պարունակում են սիմետիկոն (մետեորիզմը նվազեցնող դեղամիջոց) և մելատոնին (ցիրկադային ռիթմերը կարգավորող հորմոն):
Այս մասին «Վեդոմոստի»-ին հայտնել է գերատեսչության մամուլի ծառայության ներկայացուցիչը՝ հավելելով, որ սննդային հավելումների բարեխիղճ արտադրողները ներգրավված են նման հավելումների հայտնաբերման աշխատանքներում։
Նրանց հետ միասին ծառայության հիման վրա ստեղծվել է աշխատանքային խումբ։ Այն զբաղվում է հավելումների գրանցման և Ռուսաստանում արգելված նյութերով սննդային հավելումների շրջանառության կանխարգելման հարցերով։
Գերատեսչությունը նշել է, որ սննդային հավելումներում արգելված են սինթետիկ բուժիչ նյութերն ու հորմոնները (սիմետիկոն և մելատոնին), որոնք էական սննդային գործոններ չեն: «Սիմետիկոնն ու մելատոնինը գրանցված են որպես դեղագործական նյութեր և անկախ դեղամիջոցներ», հավելել է կառույցը։
Ընդհանուր առմամբ, ծառայությունը ապրանքների պետական գրանցման վկայականների միասնական ռեգիստրում մշտադիտարկելիս հայտնաբերել է 48 կենսաբանական ակտիվ սննդային հավելումներ, որոնք չեն համապատասխանում Մաքսային միության ակտերի՝ ՀՀ լիազոր մարմինների կողմից գրանցված պարտադիր պահանջներին։ Դա, ըստ գերատեսչության, վտանգ է ներկայացնում շրջանառության մեջ ոչ անվտանգ արտադրանքի հայտնվելու համար։
Ռոսպոտրեբնադզորը տեղեկացրել է նաև Եվրասիական տնտեսական հանձնաժողովին, որպեսզի Հայաստանի էկոնոմիկայի նախարարությունը ստուգի հավելումների պետական գրանցման տրված հավաստագրերի վավերականությունը։