Ռուսաստանը շարունակում է կատարել իր պարտավորությունները՝ մասնակցելով եռակողմ համաձայնագրերին Ադրբեջանի և Հայաստանի հետ Լեռնային Ղարաբաղում տիրող իրավիճակի կարգավորման համար:
Ծանր աշխատանք է տարվում Բաքվի և Երևանի հետ, ասել է ՌԴ նախագահի խոսնակ Դմիտրի Պեսկովը՝ անդրադառնալով ԱՄՆ պետքարտուղար Էնթոնի Բլինքենին, ով կոչ է արել Իլհամ Ալիևին ապաշրջափակել Լաչինի միջանցքը:
ՌԻԱ Նովոստիի հաղորդմամբ, նա, մասնավորապես, ասել է.
«Ռուսաստանը, որպես երկու տարի առաջ ստորագրված եռակողմ համաձայնագրերի և փաստաթղթերի կողմերից մեկը, շարունակում է կատարել իր պարտավորությունները և շարունակում է շատ տքնաջան և բարդ աշխատանքը ինչպես Հայաստանի, այնպես էլ Ադրբեջանի հետ»,- լրագրողներին ասել է Պեսկովը՝ պատասխանելով հարցին, թե ինչպես է Կրեմլը վերաբերում Լաչինի միջանցքում ստեղծված իրավիճակի մասով ԱՄՆ դիրքորոշմանը:
Ավելի վաղ Բլինքենը Ալիևի հետ հեռախոսազրույցում հորդորել էր Ադրբեջանին կրկնապատկել ջանքերը Հայաստանի հետ երկկողմ խաղաղ բանակցություններում, ինչպես նաև «անհապաղ» ապաշրջափակել Լաչինի միջանցքը: