Ֆրանսիայի արտաքին գործերի նախարար Ստեֆան Սեժուրնեն վերահաստատել է Փարիզի անվերապահ, ամբողջական և մշտական հանձնառությունը՝ աջակցելու Հայաստանի ինքնիշխանությանը և անձեռնմխելիությանը: Այս մասին հաղորդագրություն է տարածել Ֆրանսիայի արտաքին գործերի նախարարությունը՝ անդրադառնալով Հայաստանի և Ֆրանսիայի արտաքին գործերի նախարարներ Արարատ Միրզոյանի և Ստեֆան Սեժուրնեի հանդիպմանը։
Նախարարները քննարկել են երկկողմ համագործակցության ամրապնդման ուղղությունները, մասնավորապես՝ տրանսպորտի, էներգետիկայի և ջրային ռեսուրսների ոլորտներում ենթակառուցվածքային նախագծերի զարգացումը:
Քննարկվել են նաև Հայաստան-Եվրամիություն հարաբերությունների ամրապնդմանն առնչվող հարցեր:
«Ֆրանսիան շարունակում է ավելացնել հումանիտար աջակցությունը Հայաստանին և Լեռնային Ղարաբաղի փախստականներին: Խոսքը 29 միլիոն եվրո կազմող օգնության մասին է, որն ուղղված է ՀԿ-ներին, ԿԽՄԿ-ին, Հայկական կարմիր խաչին և ՄԱԿ-ի գործակալություններին՝ հատկապես խոցելի խմբերի սոցիալական, բժշկական, կրթական ու ֆինանսական աջակցության ընդունման և ապահովման համար»,- ասված է հաղորդագրության մեջ:
Բացի այդ, նախարարներն անդրադարձել են նաև Հայաստանի և Ադրբեջանի միջև հարաբերությունների կարգավորմանն ուղղված քննարկումներին:
Սեժուրնեն «վերահաստատել է Ֆրանսիայի աջակցությունը ԵՄ-ի և ԱՄՆ-ի միջնորդական ջանքերին»։
«Արդարացի և տևական խաղաղությունը հնարավոր է միայն միջազգային իրավունքը, երկու երկրների ինքնիշխանությունը, տարածքային ամբողջականությունը և սահմանների անձեռնմխելիությունը հարգելու դեպքում»,- նշված է ԱԳՆ հայտարարության մեջ: