MediaHub-ի տեղեկություններով՝ Արագածոտնի, Կոտայքի, Գեղարքունիքի, Տավուշի պարեկները հսկայական գումարների վնաս են պատճառել "Քաղաքացիական պայմանագիր" խմբակցության պատգամավոր Խաչատուր Սուքիասյանի ընտանեկան բիզնեսին։
Բանն այն է, որ "Սիլ ինշուրանս" ապահովագրական ընկերությունում ԿԱՍԿՈ ապահովագրություն անցած երկու տասնյակից ավելի պարեկային ծառայության մեքենաներ են վթարվել 3 ամսում, ու հիմնական մասը վերածվել են երկաթե ջարդոնի։
MediaHub-ը գրավոր հարցում էր ուղարկել ՀՀ Նեքրին գործերի նախարարություն՝ ճշտելու, թե Արագածոտնի, Կոտայքի, Գեղարքունիքի, Տավուշի մարզերում հունվարից մեկնարկած ՆԳՆ ոստիկանության պարեկային ծառայության ծառայողական մեքենաներից մինչ օրս քանի՞սն են վնասվել, քանի՞սը ենթակա չեն վերանորոգման, ո՞ր ապահովագրական ընկերությունն է սպասարկում եւ որքա՞ն գումար է փոխհատուցվել ընկերությունից։
Մեր հարցմանն ի պատասխան ՆԳՆ-ից հայտնել են, որ հիշալ 4 մարզերում 24 ճանապարհատրանսպորտային պատահար է տեղի ունեցել պարեկների մասնակցությամբ։
"2023թ-ի հունվար ամսից Հայաստանի Հանրապետության Արագածոտնի, Կոտայքի, Գեղարքունիքի, Տավուշի մարզերում մեկնարկած ՀՀ ՆԳՆ ոստիկանության պարեկային ծառայության ծառայողական տրանսպորտային միջոցների մասնակցությամբ՝ 27.03.2023թ. ներառյալ գրանցվել է 24 ճանապարհատրանսպորտային պատահար։ Տրանսպորտային միջոցները` ապահովագրված են «Ինգո Արմենիա» և «Սիլ Ինշուրանս» ապահովագրական ընկերություններում։ Վթարված տրանսպորտային միջոցների վերանորոգման համար տրամադրվող հատուցման գումարները փոխանցվում են ապահովագրական ընկերությունների կողմից՝ վերանորոգող կազմակերպությանը",-հայտնում են նախարարությունից՝ չհստակեցնելով, թե ինչ գումարների մասին է խոսքը, թեպետ մենք այդ մասին հարցրել էինք։
Նշենք, որ ՀՀ ոստիկանությունն իշխանության հետ փոխկապակցված ընկերությանը մեքենաների ապահովագրությունը պատվիրել էր առանց մրցույթի։ Կառավարության փետրվարի 16-ի նիստում ՆԳ նախարար Վահե Ղազարյանն՝ անդրադառնալով աղմուկ հանած թեմային, ասաց, որ ոստիկանության ավտոմեքենաների ապահովագրության ծառայության ձեռքբերումն իրականացվել է ՀՀ կառավարության որոշմամբ՝ մեկ անձից գնում կատարելու եղանակով: Ի դեպ, Ավտոապահովագրողների բյուրոն այս գործարքի վերաբերյալ կարգապահական վարույթ է սկսել իշխող պատգամավոր Խաչատուր Սուքիասյանին ու նրա ընտանիքին պատկանող «Սիլ Ինշուրանսի» դեմ։ Ընկերությունը միայն Ոստիկանության ավտոմեքենաների ապահովագրման համար այս տարի պետբյուջեից մոտ կես միլիոն դոլար կստանա։ Արձանագրության մեջ ասվում է, որ «ՍԻԼ Ինշուրանս» ապահովագրական ընկերությունը կարգապահական տույժի է ենթարկվել Հայաստանի Ավտոապահովագրողների բյուրոյի կանոնների խախտման համար, հայտնում են բյուրոյից։
«Ապահովագրողների կողմից ապահովագրավճարների սահմանման և դրա կիրառման գործընթացի նկատմամբ նվազագույն պահանջները խախտելու համար ընկերության նկատմամբ կիրառվել է տուգանք՝ ապագայում նման խախտում չկրկնելու հանձնարարականով», - ասված է արձանագրության մեջ:
Լիա Սարգսյան