Շրի Լանկայի փախուստի դիմած նախկին նախագահ Գոթաբայա Ռաջափակսան, ինչպես սպասվում է, կդադարեցնի ինքնավտարումը Թաիլանդ եւ շուտով հայրենիք կվերադառնա, AFP գործակալությանը տեղեկացրել են երկրի իշխանությունները։
73-ամյա Ռաջափակսան հուլիսին զինվորական պարեկախմբի ուղեկցությամբ հեռացել էր կղզուց, երբ ընդվզողների ամբոխը ներխուժել էր նրա պաշտոնական նստավայրը մի քանի ամիս տեւած ցույցերից հետո, որոնց մասնակիցները նրան մեղադրում էին երկրի աննախադեպ տնտեսական ճգնաժամի մեջ։
Նա հրաժարականի դիմում էր տվել Սինգապուրում, իսկ հետո թռել էր Բանգկոկ, որտեղից էլ դիմել էր իր հաջորդին՝ խնդրելով աջակցել իր վերադարձին, որը նշանակվել է ուրբաթ ուշ երեկոյան կամ շաբաթ վաղ առավոտյան։
«Նա ապրում էր թաիլանդյան հյուրանոցում՝ որպես բանտարկյալ եւ շատ էր ցանկանում վերադառնալ,- AFP-ին ասել է պաշտպանական գերատեսչության աղբյուրը։- Մենք հենց նոր ստեղծել ենք անվտանգության նոր ստորաբաժանում, որպեսզի պաշտպանենք նրան վերադառնալուց հետո։ Ստորաբաժանման կազմում զինծառայողներ են եւ ոստիկանության հատուկ նշանակության ջոկատների ծառայողներ»։
Շրի Լանկայի սահմանադրությունը երաշխավորում է պահպանության, ավտոմեքենայի եւ բնակարանի առկայություն նախկին նախագահների համար։
Իրավապաշտպանները հայտարարել են, որ փորձելու են հասնել Ռաջափակսայի կալանավորմանը մի շարք հանցագործությունների համար, ներառյալ 2009թ. նրա ենթադրյալ դերը թերթի հայտնի խմբագիր Լասանթա Վիքրեմատունգեի սպանության գործում։
Ռաջափակսայի հրաժարականը վերջ դրեց նրա նախագահական իմունիտետին, ինչը կարող է հանգեցնել նրա դեմ ձգձգվող քրեական գործերի վերականգնմանը։
Սինգապուրը հրաժարվել է երկարացնել նրա կարճաժամկետ վիզան, եւ նա օգոստոսին մեկնել է Թաիլանդ, բայց Բանգկոկի իշխանությունները նրան հրամայել են դուրս չգալ հյուրանոցից՝ սեփական անվտանգության նպատակներով։
Ռաջափակսայի կրտսեր եղբայրը՝ ֆինանսների նախարար Բազիլը, օգոստոսին հանդիպել է Շրի Լանկայի նախագահ Ռանիլ Վիքրեմեսինհի հետ եւ պաշտպանություն խնդրել, որպեսզի նախկին նախագահին թույլ տրվի վերադառնալ։
Ուրբաթ ոստիկանությունը քաղաքացիական հագուստով աշխատակիցների եւ զինված թիկնապահների է կանգնեցրել կառավարական նստավայրի մոտ, որը հատկացվել է Ռաջափակսային Կոլոմբոյում։ Նրա մասնավոր տան պահպանությունը նույնպես ուժեղացվել է, տեղեկացրել են պաշտոնատար անձինք։
Կոլոմբոյի գլխավոր օդանավակայանի ոստիկանությունը տեղեկացրել է, որ ներկայում, նրա ժամանելուն ընդառաջ, իրականացվում է անվտանգության ապահովման գործողություն։