Կառավարության որոշմամբ՝ երեկ Շիրակի մարզպետ նշանակվեց Մուշեղ Մուրադյանը, իսկ Նազելի Բաղդասարյանն ավելի վաղ հայտնել էր պաշտոնը թողնելու մասին։
MediaHub.am-ի հետ զրույցում նորանշանակ մարզպետ Մուշեղ Մուրադյանը նշեց, որ այսօրվանից պաշտոնապես անցել է աշխատանքի և քաջ գիտակցում է, թե ինչ պատասխանատվություն է ստանձնել։
«Ես ծանոթ ու քաջատեղյակ եմ հայրենի մարզի հոգսերին ու խնդիրներին և վստահ եմ՝ յուրաքանչյուր հոգս առաջնային եմ համարելու։ Հետևողական աշխատանքով, քայլ առ քայլ գնալու եմ խնդիրները լուծելու ճանապարհով։ Գիտեմ, որ հեշտ չի լինելու, մեծ մարտահրավերներ են սպասվում, բայց համոզված եմ, որ համագործակցությունների արդյունքում հաջողելու ենք»,-ասաց նա։
Դիտարկմանը, թե նախկին մարզպետների օրոք հաճախ են խոսել և նույնիսկ ապացուցվել են խախտումներ, չարաշահումներ, վերջինս արձագանքեց՝ ծանոթ է մարզպետարանի կառուցվածքին,
Շիրակի մարզին և հնարավոր է, որ խախտումներ եղել են։
«Իմ հայրենի մարզն է, ամեն ինչից տեղյակ եմ և շենացնելու, կառուցելու ոգով եմ տրամադրված։ Չեմ բացառում, որ նախկինում խախտումներ են եղել, բայց կարող եմ վստահեցնել, որ այսուհետ առաջ ենք շարժվելու միայն օրենքով»,-ընդգծեց Մուրադյանը։
Լիաննա Թորոսյան