Բրիտանացի գիտնականները բացահայտել են, այսպես կոչված, աստրալային կամ «մարմնից դուրս» ճանապարհորդության գաղտնիքը։
Բիրմինգհեմի համալսարանի մասնագետների կարծիքով՝ նման փորձառությունները ոչ այլ ինչ են, քան վառ հալյուցինացիաներ։
Մարմնից դուրս «ճանապարհորդությունը», ըստ գիտնականների, անում են այն մարդիկ, որոնք ունեն ուղեղի աշխատանքի խանգարումներ, որոնք առաջացնում են ապակողմնորոշման զգացում։ Կորցնում են պատկերացումները, թե իրականում իրենց մարմինը որտեղ է:
Ըստ գիտնականների՝ աստրալային ճանապարհորդությունն ամենևին էլ առեղծվածային իրադարձություն չէ, այլ իրական նեյրոֆիզիոլոգիական ֆենոմեն։
Բիրմինգհեմի համալսարանի թիմը` բժիշկ Ջեյսոն Բրեյթվեյթի գլխավորությամբ, հետազոտություն է անցկացրել, որին մասնակցել են կամավորներ, ովքեր նախկինում ունեցել են աստրալային ճանապարհորդություն:
Փորձի ընթացքում մասնակիցներն ընկղմվել են վիրտուալ իրականության մեջ, դրել են 3D ակնոցներ։ Նրանց ցուցադրվել է համակարգչով ստեղծած աշխարհ, որի միջով ճանապարհորդել է վիրտուալ 3D հերոսը։ Կամավորներն այնքան են ընկղմվել այս համակարգչային աշխարհում, որ որոշ ժամանակ իրենց նույնացնում էին վիրտուալ հերոսի հետ. նրանց թվում էր, թե իրենց հոգին տեղափոխվել է այդ մարմինը:
Այսպիսով, գիտնականներին հաջողվել է լաբորատորիայում մոդելավորել աստրալային ճանապարհորդությունը: