Թեհրանում սկսվել է Ռուսաստանի և Իրանի նախագահներ Վլադիմիր Պուտինի և Էբրահիմ Ռաիսիի հանդիպումը, հայտնում է «РИА Новости»-ի թղթակիցը։
Պուտինը մեկօրյա այցով գտնվում է Իրանի մայրաքաղաքում։ Ինչպես ակնկալվում է, երկու երկրների նախագահները կքննարկեն երկկողմ համագործակցության հարցեր, ինչպես նաև միջազգային խնդիրներ։
Այնուհետև ՌԴ ղեկավարը բանակցություններ կվարի Իրանի գերագույն առաջնորդ Ալի Խամենեիի հետ։ Դրանից հետո Վլադիմիր Պուտինը կհանդիպի իր թուրք գործընկեր Ռեջեփ Թայիփ Էրդողանի հետ։
Թեհրանում բանակցություններ կանցկացվեն նաև Ռուսաստան-Իրան-Թուրքիա ձևաչափով։ Սպասվում է, որ հանդիպման արդյունքներով երկրների նախագահները հանդես կգան հայտարարությամբ։
Ինչպես նշել է ՌԴ նախագահի մամուլի քարտուղար Դմիտրի Պեսկովը, բանակցությունների հիմնական թեմաները կլինեն Իրանի և Թուրքիայի հետ առևտրատնտեսական կապերը և տարածաշրջանային համագործակցությունը։