«ՀՀ ԶՈւ-ն շարունակում է ՀՀ-ի պաշտպանության ռազմական բաղադրիչի ուղղությամբ մարտական խնդիրների կատարումը, ինչպես նաև աշխատանքներ են տարվում դիվանագիտական ճանապարհով ՀՀ տարածքային ամբողջականության վերականգման ուղղությամբ»։ Այս մասին MediaHub.am-ի հարցմանը ի պատասխան նշված է պաշտպանության նախարարության գրավոր պատասխանի մեջ։

MediaHub.am-ը պաշտպանության նախարարությունից հետաքրքրվել էր, թե Ջերմուկի դիրքերի ուղղությամբ ներթափանցած ադրբեջանական խմբերը ինչո՞ւ չեն չեզոքացվում, փոխարենը թողնում ենք, որ ամրանան, քանի որ կան տեղեկություններ, որ ինժեներական աշխատանքներ են կատարում։ 

Հիշեցնենք, երեկ ՀՀ զինված ուժերի գլխավոր շտաբի պետի տեղակալ գեներալ-մայոր Առաքել Մարտիկյանը հայտարարել էր, որ ամենամեծ տարածքային կորուստները եղել են Ջերմուկի հատվածում։ Անդրադառնալով MediaHub.am-ի հարցին, թե ի՞նչ է արվում, որպեսզի ՀՀ սուվերեն տարածք ներխուժած ադրբեջանցիները ետ շպրտվեն ելման դիրքեր, նա ասել էր, որ ունեն հրաման ՀՀ սուվերեն տարածքը վերականգնելու։

«Առաջին օրվա դեպքերը հենց դրա համար էլ եղել են, չենք թողնում ամրանան, տեխնիկա օգտագործեն, առաջ գան։ Լարվածություն կա, դրանից չենք վախենում, ամեն ինչ պետք է անենք, որ հակառակորդը չամրանա»,-վստահեցրեց նա։ 

Անի Գևորգյան