Ադրբեջանցիների կողմից Արցախի շրջափակման 11-րդ օրն է։ Հայաստանի իշխանությունների՝ Լաչինի միջանցքը բացելուն ուղղված քայլերն ընդդիմադիր ուժերը բավարար չեն համարում, նույնիսկ շեշտում են՝ ՔՊ-ականները ձեռքերը լվացել են Արցախից։ Այս թեմայի շուրջ զրուցել ենք Ազգային ինքնորոշում միավորման առաջնորդ Պարույր Հայրիկյանի հետ։

-Պարոն Հայրիկյան, ի՞նչ մեխանիզմներով հնարավոր կլինի բացել Արցախը Հայաստանին կապող ճանապարհը, երբ իշխանությունները հրաժարվում են որեւէ պարտավորություն ստանձնել այդ գործում՝ ուղիղ մեղադրելով Ռուսաստանին։

-Ուրիշ ի՞նչ կարող են ասել, եթե իրենք հենվում են նոյեմբերի 9-ի եռակողմ հայտարարության վրա։ Ոչ միայն հենվում են, այլեւ ամբողջ աշխարհին համոզեցին, որ դա օրինական փաստաթուղթ է։ Իշխանությունները, բնական է, որ դա էլ պետք է ասեին, որովհետեւ իրենք են տվել՝ առանց մեկ կրակոցի։ Հիմա ասում են՝ տվել ենք ռուսներին, իբրեւ՝ լավ բան են արել։ Մոռանում են, որ մենք Ռուսաստանից ենք անկախացել, իսկ Ռուսաստանն այն պետությունն է, որ մեզ համար ստեղծեց Արցախի հարցը։ Մյուսներից ոչ պակաս մտահոգ եմ, բայց ո՛չ իշխանություն, ո՛չ էլ իշխանական լծակ ունեմ որեւէ բան փոխելու։

-Ի՞նչ կարելի է անել ստեղծված իրավիճակում։

-Իշխանությունների՝ միջազգային հանրությանը այս գործընթացին ներգրավելու քայլերը ճիշտ են, բայց՝ շատ ուշացած։ Դա հավասարազոր է նրան, որ ճանապարհը, որով գնում ես, մի կողմից տանում է Փարիզ, մյուսով՝ Մոսկվա։ Դու ընտրում ես Մոսկվան, ու այդ ճանապարհին առկա երեւույթների համար մեղադրում ես Փարիզին։ Մենք 2013թ․-ին սխալ ընտրություն ենք կատարել։ Դա միայն տնտեսական ընտրություն չէր, դա նաեւ քաղաքակրթական ընտրություն էր, որի համար պատժվում ենք։ Հեղափոխություն անողները եկան, չուզեցին որեւէ քայլ կատարել, խեղեցին Արցախի հարցը, մոռանալով, որ դա հայկական հարցի մի մասն է։ Մենք բավական լավ փոխանցումներ էինք ստացել միջազգային հանրությունից, մասնավորապես ԵՄ-ից՝ Հայոց ցեղասպանության ճանաչումն ու դատապարտումը։ Այդ բոլորն անտեսվեց, միջազգային իրավունքը մոռացվեց, դարձանք Ռուսաստանի կամակատարը։

-Իշխանությունը Արցախի շուրջ ստեղծված իրավիճակի համար մեղադրում է բոլորին, բայց չեն ընդունում իրենց մեղավորությունը։ 2021թ-ին ընդունած կառավարության ծրագրում ամրագրել են՝ Հայաստանը շարունակում է մնալ Արցախի Հանրապետության անվտանգության երաշխավորը։ Բացի այդ, նոյեմբերի 9-ի եռակողմ հայտարարության տակ ստորագրել է նաեւ Նիկոլ Փաշինյանը։

-Եթե կա մեկը, ով անկեղծորեն հավատում է այսօրվա իշխանությունների խոսքին, ես կարող եմ հիանալ իր լավատեսությամբ։ Այս իշխանությունները ինչ ասել են, արել են դրա հակառակը, բացի որոշ ճանապարհների կառուցումից եւ մի քանի գործերից, որոնք փող են բերում իբրեւ պետությանը, բայց որով իրենց պարգևավճար են բաժանում։ Մնացած հարցերում ինչ ասել են, արել են հակառակը։ Ասացին՝ «Մերժիր Սերժին», բայց Սերժի սահմանադրությունը չմերժեցին։ Երեք անգամ փոխեցին սահմանադրական բարեփոխումների ժամանակը, արդեն մեզ համոզեցին, որ հիմնական օրենքը տասերորդական բան է, չի կարելի լուրջ բան սպասել։

-Ընդդիմադիր ուժերը երեկ հավաքվել էին, Դուք հրավեր ստացե՞լ էիք, ինչո՞ւ չեք մասնակցել։

-Ես հրավեր ստացել եմ, քանի որ ծանրաբեռնված էի այլ գործերով, հրավերը ուշ եմ տեսել, հետեւաբար չհասցրեցի գնալ։ Հետո ինձ զանգահարեց Արծվիկ Մինասյանը։ Իհարկե կմասնակցեի, որքան էլ զբաղված լինեի։

Լիա Սարգսյան