Վաղվա հանդիպումը մեծապես ուղղված է մեր տնտեսական հնարավորություններին, մեր կարողությունների բարձրացմանը։ Աշխարհաքաղաքական մեծ իրադարձություն, չեմ կարծում, որ պետք է դարձնել այս միջոցառումը, իհարկե, ինքը շատ կարևոր միջոցառում է մեզ համար, բայց նաև պետք է փորձենք ճիշտ կառավարել այն ակնկալիքները, որ այսօր կան։
Այս մասին այսօր լրագրողների հետ զրույցում անդրադառնալով վաղը ՀՀ-ԱՄՆ-ԵՄ ձևաչափով հանդիպմանը՝ ասաց ԱԳ փոխնախարար Վահան Կոստանյանը։
«Կարծում եմ, որ վաղը շատ սոլիդ հանդիպում կունենանք, և կլինեն արդյունքները, որի մասին կտեղեկացվեք»,- ասաց Կոստանյանը։
Ինչ վերաբերում է երեկ տեղի ունեցած Բլինքենի՝ Ալիևին կատարած զանգին, որի ընթացքում Ալիևը սպառնացել է, որ եթե չհետաձգվի այդ հանդիպումը, տարածաշրջանում անկայունություն կարող է տեղի ունենալ, Կոստանյանն ասաց․ «Կան պետություններ, որոնք փորձում են չափից մեծ ակնկալիքներ սերմանել նաև մեր հասարակության մեջ՝ վաղվա միջոցառման հետ կապված։ Բացարձակապես ընդունելի չեն նման մեկնաբանությունները այլ երկրների կողմից, դա մեր սուվերեն իրավունքն է՝ զարգացնել հարաբերությունները մեր բոլոր գործընկերների հետ, այդ թվում՝ Միացյալ Նահանգների և Եվրամիության»։