«Փաստ» օրաթերթը գրում է.
Հուլիսի 20-ին Նիկոլ Փաշինյանը փաստացի հայտարարել է Ամենայն հայոց կաթողիկոս Գարեգին Երկրորդի հրաժարականի անհրաժեշտության մասին։ Հրապարակած ուղերձում նա նշել է. «Կտրիճ Ներսիսյանը (Գարեգին Երկրորդի աշխարհիկ անունը) պետք է ազատի Վեհարանը... Պատրաստվեք Մեծ հոգևոր հանդիպման Էջմիածնի կենտրոնական հրապարակում»։ Ավելի վաղ՝ հուլիսի 16-ին կայացած մամուլի ասուլիսում Փաշինյանը հայտարարել է, որ պատրաստ է գլխավորել «հեղափոխությունը» Հայ առաքելական եկեղեցում՝ համեմատելով այն իր իշխանության գալու՝ 2018 թ. շարժման հետ, երբ պաշտոնից հեռացվեց նախագահ Սերժ Սարգսյանը։
Միջազգային կազմակերպությունները, որոնք պաշտպանում են կրոնական ազատությունները, ավելի հաճախ են մտահոգություն հայտնում Եկեղեցու իրավունքների խախտման կապակցությամբ Հայաստանում։ ԱՄՆ-ում գործող հայկական «Armenian Weekly» պարբերականը Փաշինյանի գործողությունները Եկեղեցու դեմ համարում է «կարմիր գծի հատում»՝ նշելով, որ նման դեպքում նրա իշխանության օրերը հաշված են։
Մեր ունեցած տեղեկություններով, իշխող «Քաղաքացիական պայմանագիր» կուսակցության ներսում կան տարաձայնություններ՝ Եկեղեցու նկատմամբ տարվող քաղաքականության վերաբերյալ։ Սակայն Փաշինյանը շարունակում է իր կողմնակիցներին համոզել Եկեղեցին քաղաքական վերահսկողության տակ վերցնելու անհրաժեշտության մասին։
Միաժամանակ մի շարք պատգամավորներ ու այլ պաշտոնյաներ վարչապետի ցուցումով մասնակցում են Եկեղեցու հեղինակությունը թուլացնելու հանրային արշավին։ Մասնավորապես, տարածքային կառավարման և ենթակառուցվածքների նախարար Դավիթ Խուդաթյանը հուլիսի 17-ին հայտարարել է, որ կառավարությունը անհրաժեշտության դեպքում կներկայացնի «Վեհարանն ազատելու» «ճանապարհային քարտեզ», ինչպես եղել է «թավշյա հեղափոխության» ժամանակ։
Փաշինյանի քաղաքականությունը Հայ առաքելական եկեղեցու նկատմամբ ընկալվում է որպես փորձ՝ թուլացնել հասարակության մեջ մեծ վստահություն ունեցող կարևոր ինստիտուտը։ Ի վերջո, Եկեղեցին մնում է Թուրքիայի և Ադրբեջանի հանդեպ զիջումների քաղաքականությանը ընդդիմանալու գլխավոր կենտրոնը։ Միևնույն ժամանակ, Եկեղեցու վրա ճնշումն ընկալվում է որպես Փաշինյան-Ալիև «խաղաղության պայմանագրի» բանակցությունների ակնհայտ մաս, ինչպես նաև 2026 թվականի խորհրդարանական ընտրությունների նախապատրաստման տարր՝ ուղղված հիմնական ընդդիմախոսներին չեզոքացնելուն։
«Ժողովուրդ» օրաթերթը գրում է.
««Ժողովուրդ» օրաթերթի տեղեկություններով` իշխանությունները նախնական որոշում ունեն Պետական վերահսկողության ծառայությունում առաջիկայում ղեկավար չնշանակելու: Ըստ նույն աղբյուրների՝ ՀՀ վարչապետ Նիկոլ Փաշինյանը հայտարարել է, որ ՊՎԾ-ի ժամանակավոր պաշտոնակատար կնշանակվի ՊՎԾ ղեկավարի տեղակալ Ռոբերտ Բազիկյանը, ով արդեն նախկին ղեկավար Ռոմանոս Պետրոսյանի հավատարիմն է դարձել, իսկ ավելի ուշ՝ հետո, կորոշեն ինչ անել այդ կարեւորագույն պաշտոնի կապակցությամբ:
Բանն այն է, որ իշխանությունները մտադրություն ունեն Ռոմանոս Պետրոսյանին վերադարձնել ՊՎԾ ղեկավարի պաշտոնում՝ ՀԷՑ-ի «գործերը ավարտելուց հետո»:
«Ժողովուրդ» օրաթերթի աղբյուրները տեղեկացնում են, որ Պետրոսյանը համաձայնել է ՀԷՑ կառավարումը ժամանակավոր իրականացնել, այնտեղ այլ անձ նշանակել, որից հետո դարձյալ կվերադառնա իր պաշտոնին: Ու դա է պատճառը, որ Ռոմանոս Պետրոսյանը ՊՎԾ-ում իր ամենավստահելի մարդկանց տարել է ՀԷՑ՝ այնտեղ իրավիճակն իրենց ձեռքում վերցնելու, կադրային փոփոխություններ իրականացնելու ու նորից իր պաշտոնին վերադառնալու նպատակով:
Չնայած, չի բացառվում, որ ՀԷՑ-ում «թեժ» լինելու պարագայում՝ Պետրոսյանը երկար կմնա այդ պաշտոնում, իսկ ՊՎԾ-ն՝ առանց ղեկավարի»։
«Հրապարակ» թերթը գրել է․
«ՔՊ-ում շատերն աղոթում են, որ Փաշինյանը մի հրաշքով փոշմանի Եկեղեցին զավթելու մտքից, եւ իրենք ստիպված չլինեն դուրս գալ փողոց, գրավել Մայր Աթոռը։
Նախօրեին Նիկոլ Փաշինյանը հայտարարեց․ «Կտրիճ Ներսիսյանը պետք է ազատի Վեհարանը»... «Ապրեք աղոթքով, պահեցողությամբ, ծոմապահովությամբ եւ պատրաստվեք մեծ հոգեւոր հանդիպմանն Էջմիածնի կենտրոնական հրապարակում»:
Պարզ է, որ ինքն անձամբ է ղեկավարելու դեպի Վեհարան արշավը, եւ սա ոչ այնքան արշավ է կաթողիկոսի դեմ, որքան իր թիմի համար թեստ, որ հասկանա, թե որքան է իր վարկանիշը, եւ ինչքանով են պատրաստ ցանկացած խելահեղության` իր կոչով:
Նաեւ տեսնի, թե կարողանալո՞ւ է վերարտադրվել 2026-ին, ժողովուրդը կգնա՞ իր հետեւից, թե՞ միայն կերակրատաշտով իրեն կապվածներն են հետեւելու:
Ի դեպ, ՔՊ-ի ողջամիտ թեւը չի հավատում, որ շեֆը կգնա նման արկածախնդրության: Նրանցից մեկը մեզ ասաց, թե Նիկոլն էլ գիտի, որ Եկեղեցու աջակիցները բազմապատիկ շատ են իր ունեցած ռեսուրսից, չնայած բյուջեն իր ձեռքում է, եւ այդքան լծակներ ունի:
Ասաց, որ նա գիտի, թե իր քայլն ինչքան ծանր կարող է նստել իր վրա, իսկ նման գրառում արել է, որ ժողովրդին շեղի ՀՀ անվտանգության հետ կապված ոչ ցանկալի զարգացումներից, միջանցքի մասին Ալիեւի հայտարարություններից, որոնցից հասկանալի է, որ ոչ թե Զանգեզուրի ճանապարհ, այլ միջանցք է լինելու»: