ԱՄՆ-ը ՀԱՄԱՍ-ին Գազայի հատվածում հրադադարի նոր առաջարկ է ներկայացրել
ԱՄՆ-ը Կատարի միջնորդների միջոցով ՀԱՄԱՍ-ին նոր առաջարկ է ներկայացրել՝ փորձելով ազատել ամերիկացի պատանդ Էդան Ալեքսանդրին և վերսկսել հրադադարի բանակցությունները Գազայում, հաղորդել է Axios-ը՝ վկայակոչելով իսրայելցի և ամերիկացի պաշտոնյաների:
Աղբյուրները նշել են, որ առաջարկով ԱՄՆ նախագահ Դոնալդ Թրամփը հանդես կգա հայտարարությամբ՝ կոչ անելով հանգստություն պահպանել Գազայում և վերսկսել բանակցությունները մշտական հրադադարի շուրջ՝ Ալեքսանդրին ազատ արձակելու դիմաց:
Հայտնի չէ, թե ՀԱՄԱՍ-ը կընդունի՞ այս առաջարկը։ «Դեռ համաձայնություն չկա»,- ասել է ամերիկացի պաշտոնյան։
Իսրայելցի պաշտոնյան ասել է, որ նոր առաջարկը «ավելի շատ գաղափար է, որը լիովին պարզ կամ մշակված չէ»:
Մինչդեռ արաբ դիվանագետը, խոսելով «The Times of Israel»-ի հետ, կասկած է հայտնել, որ ՀԱՄԱՍ-ը կհամաձայնի ազատ արձակել Ալեքսանդրին միայն Թրամփի հայտարարության պատճառով։
Նրա կարծիքով՝ պաղեստինյան շարժումը կպահանջի ավելի առարկայական բան։
Կատարից և Եգիպտոսից միջնորդները հինգշաբթի երեկոյան Դոհայում հանդիպել են ՀԱՄԱՍ-ի պատվիրակության հետ՝ քննարկելու ԱՄՆ-ի վերջին առաջարկը, ասել է արաբ դիվանագետը:
Թե Իսրայելն ինչպես կարձագանքի դրան, նույնպես պարզ չէ:
Հինգշաբթի օրը Իսրայելի վարչապետ Բենիամին Նեթանյահուն խորհրդակցություններ է անցկացրել իր անվտանգության ղեկավարների և գլխավոր խորհրդականների հետ՝ քննարկելու այդ հարցը։
Axios-ը հայտնել է, որ Եգիպտոսը մի քանի օր առաջ Կահիրեում հանդիպել է ՀԱՄԱՍ-ի պաշտոնյաների հետ՝ քննարկելու մեկ այլ առաջարկ՝ փորձելով շարունակել բանակցությունները:
Իսրայելցի պաշտոնյան ասել է, որ առաջարկը շատ նման է Թրամփի բանագնաց Սթիվ Վիտկոֆֆի կողմից նախկինում ներկայացված առաջարկին, սակայն ՀԱՄԱՍ-ը չի ընդունել այն:
Եգիպտացիները սպառնացել են արտաքսել ՀԱՄԱՍ-ի նախկին բանտարկյալներին, որոնք Իսրայելի կողմից ազատ են արձակվել Գազայի հրադադարի շրջանակներում և այդ ժամանակից ի վեր պահվում են Կահիրեում, եթե խմբավորումը չհամաձայնի ազատ արձակել ավելի շատ պատանդների:
Հաղորդվում է, որ Գազայից դուրս ՀԱՄԱՍ-ի առաջնորդները պատրաստ էին ընդունել Եգիպտոսի առաջարկը, սակայն Գազայում շարժման ռազմական առաջնորդ Մուհամմեդ Սինվարը մերժել է այն:
