«Խաղաղ հարևանություն նախաձեռնությունը չի հակասում և չի փոխարինում համագործակցության որևէ այլ ձևաչափի, ընդհակառակը կօգնի, և ես հավատում եմ, որ մենք միասին շատ կարևոր բաներ կանենք», - այդ մասին հայտարարել է Վրաստանի վարչապետ Իրակլի Ղարիբաշվիլին Ադրբեջանի նախագահ Իլհամ Ալիևի հետ հանդիպումից հետո լրատվամիջոցների համար կազմակերպված համատեղ մամուլի ասուլիսում։
Նրա խոսքով, տարածաշրջանում և աշխարհում արագ փոփոխվող և բարդ մարտահրավերների պայմաններում մեծ նշանակություն է տրվում խաղաղությանը և կայունությանը, որոնք մեր տարածաշրջանի և ընդհանուր առմամբ մեր ժողովուրդների բարօրության առանցքային գործոններն են։
«Մենք անդրադարձել ենք նաև տարածաշրջանում տիրող իրավիճակին, Ադրբեջանի և Հայաստանի միջև խաղաղ բանակցային գործընթաց սկսելու վերաբերյալ վերջին պայմանավորվածությանը։ Սա, իհարկե, մեծ հույս է տալիս մեզ։ Կցանկանայի կրկնել, որ Վրաստանը, ես և մեր կառավարությունը հայտարարում ենք մեր լիակատար պատրաստակամության մասին՝ շարունակելու և աջակցելու խաղաղության քաղաքականությանը, որը մենք սկսել ենք միասին», - ասել է Ղարիբաշվիլին։