Օգոստոսի 6-ին և 7-ին Սևանա լճի ափին՝ թիվ 1 հանրային լողափում (Սևանի թերաղզու աջակողմյան հատված) և Սևանի Փառատոնային այգում տեղի է ունենալու «Սևան» միջազգային երաժշտական փառատոնը: Այս մասին հայտնում է Գեղարքունիքի մարզպետարանը:

Երկու օր շարունակ Սևանի ափին կխոսենք երաժշտության լեզվով և կասենք «շնորհակալությու՜ն, Սևան»,-նշվում է տարածած հաղորդագրության մեջ:

Ջրային կոմիտեի նախագահ Կարեն Սարգսյանը տեղեկացրել է, որ այս տարի այն իրականացվում է ՀՀ կրթության, գիտության, մշակույթի և սպորտի ու շրջակա միջավայրի նախարարությունների աջակցությամբ, Գեղարքունիքի մարզպետարանի, Սևանի համայնքապետարանի, DVV ինտերնացիոնալի ֆինասական աջակցությամբ, ինչպես նաև ՀՀ Պետական ֆիլհարմոնիայի, EU4Sevan ծրագրի, Սևան ազգային պարկի և գործընկերների հետ գործակցությամբ:

Փառատոնին կմասնակցեն 18 երաժշտական խմբեր Հայաստանից, Արցախից, Ռուսաստանից, Ֆրանսիայից և Ավստրիայից:

Փառատոնը կմեկնարկի օգոստոսի 6-ին թիվ 1 հանրային լողափում, իսկ օգոստոսի 7-ին Սևանի քաղաքային զբոսայգում:

Տաղավարային գոտիները կաշխատեն ժամը 13:00-ից, իսկ համերգային մասի բացումը տեղի կունենա ժամը 17:00 -ին:

Փառատոնը կազմակերպվում է «Սևան» երիտասարդական ակումբ հասարակական կազմակերպության կողմից: