«Փաստ» օրաթերթը գրում է

Օրեր առաջ մենք տեղեկացրել էինք, որ Հայաստանի մարդու իրավունքների նախկին պաշտպան Արման Թաթոյանն առաջիկայում հայտարարելու է նոր շարժում սկսելու, ինչպես նաև սեպտեմբերին կայանալիք Երևանի ավագանու ընտրություններին մասնակցելու որոշման մասին:

Մեր ունեցած տեղեկություններով, Թաթոյանի առաջադրմամբ ընդդիմադիր մի շարք ուժեր ցանկություն ունեն ձևավորել նոր բևեռ. ավելին, մեր աղբյուրների փոխանցմամբ, մի քանի ընդդիմադիր քաղաքական ուժ արդեն իսկ լրջորեն հակված է պաշտպանել Թաթոյանի թեկնածությունը: Կան տեղեկություններ, որ նրա թեկնածության նկատմամբ բավական դրական է տրամադրված նաև ՀՀ երրորդ նախագահ Սերժ Սարգսյանը:

Ի դեպ, թերթին հայտնի է նաև դարձել, որ Արման Թաթոյանին է միացել ՀՀ ՊԵԿ նախկին նախագահ Դավիթ Անանյանը, որի եղբայրը գործարար Բարսեղ Բեգլարյանին պատկանող «Արարատբանկի» խորհրդի նախագահն է:

«Հրապարակ» թերթը գրում է.

«Պաշտպանության նախարարությունը հունիսի 2-ին 5 մլն դրամի պայմանագիր է ստորագրել «Արկածախնդիր» ՍՊԸ-ի հետ: Բավականին հուսադրող անվամբ այս ընկերությունն այդ գումարի դիմաց կազմակերպել է մշակութային միջոցառում՝ նվիրված Երկրորդ աշխարհամարտին։ Գնման պայմանագրից տեղեկանում ենք, որ այդ գումարով տպվել են պաստառներ, բուկլետներ, եւ 70 հոգու համար նախատեսված ֆուրշետ է մատուցվել, ենթադրվում է, որ միջոցառման մասնակիցները եղել են 70 հոգի։

Մենք գրավոր հարցում ենք ուղարկել ՊՆ՝ հասկանալու, թե ինչի համար է պաշտպանական գերատեսչությունը հունիսին, այլ ոչ թե մայիսին, որոշել Երկրորդ աշխարհամարտին նվիրված մշակութային միջոցառում կազմակերպել, ովքեր են միջոցառման ֆուրշետին մասնակցած 70 հոգին, եւ արդյո՞ք «Արկածախնդիր» ՍՊԸ-ից գնումը կատարվել է մրցութային պայմաններում, թե՞ Սուրեն Պապիկյանին ուղղակի գրավել է ընկերության անունը»:

«Ժողովուրդ» օրաթերթը գրում է.

«Ժողովուրդ» օրաթերթի տեղեկությունների համաձայն՝ Մարդու իրավունքների եվրոպական դատարանը ուշագրավ որոշում է կայացրել ՀՀ-ում լիազորությունները դադարեցված 7 դատավորների մասով։

Մասնավորապես, լիազորությունները դադարեցրած 7 դատավորները՝ Ալեքսեյ Սոքոյանը, Զարուհի Նախշքարյանը, Աննա Փիլոսյանը, Սուրեն Անտոնյանը եւ այլք, դիմել են ՄԻԵԴ, որը դատավորների գանգատը ընդունել է վարույթ. ուշագրավն այն է, որ բոլոր դատավորների գործերը միացվել ու քննվելու են մեկ վարույթում։ ՄԻԵԴ-ի այս որոշումը աննախադեպ է այն առումով, որ, ըստ էության, Եվրոպական դատարանը հասկացել է, որ կա խախտում, եւ առաջնահերթության սկզբունքով է քննելու լիազորությունները դադարեցրած դատավորների գործը։ Սա ենթադրել է տալիս՝ նոր «ապտակ» է սպասվում Բարձրագույն դատական խորհրդին։

Ի դեպ, մեզ հասած լուրերի համաձայն՝ ՄԻԵԴ-ը դատավորների դիմումը վարույթ ընդունելու եւ առաջնահերթությամբ 7 դատավորների հարցը մեկ վարույթում քննելու մասին անգամ տեղեկացրել է ԲԴԽ-ին։ «Ժողովուրդ» օրաթերթը դիմեց ՀՀ բարձրագույն դատական խորհուրդ՝ տեղեկությունը պարզելու համար, սակայն ի պատասխան՝ ԲԴԽ-ից հայտնեցին. «Մենք որեւէ բան ՄԻԵԴ-ից չենք ստացել եւ որեւէ գործառույթ չունենք նման հարցերը իրենց հետ քննարկելու»։

Զարմանալի է, բայց ԲԴԽ-ն ակնհայտ ստում է, քանի որ «Ժողովուրդ» օրաթերթի ձեռքում կա փաստաթուղթ, թե ինչպես է Մարդու իրավունքների եվրոպական դատարանում Հայաստանի Հանրապետության ներկայացուցիչ Եղիշե Կիրակոսյանը ՄԻԵԴ որոշման մասին գրություն ուղարկել ե՛ւ ԲԴԽ նախագահ Անդրեասյանին, ե՛ւ արդարադատության նախարար Գրիգոր Մինասյանին՝ ըստ էության պահանջելով բացատրություններ:

«Հրապարակ» թերթը գրում է.

«ԱԱԾ-ն նախօրեին հաստատեց, որ ԲԴԽ նախագահ Կարեն Անդրեասյանի վերաբերյալ եղած հրապարակումներում առկա տեղեկություններն ուսումնասիրվում են գլխավոր դատախազի տեղակալի գրության հիման վրա: Մինչ այդ, մի քանի օր կայքերը գրում էին, որ ԱԱԾ-ում Անդրեասյանի նկատմամբ քրեական վարույթ կա՝ պաշտոնեական լիազորությունների չարաշահման դեպքով։

Մեր աղբյուրներն ասում են, որ ԱԱԾ-ից Կարեն Անդրեասյանի դեմ գործողությունները կառավարում է ԱԱԾ տնօրենի տեղակալ Անդրանիկ Սիմոնյանը, ով մինչ ԱԱԾ գալը եղել է դատավոր եւ ստանձնել է դատական իշխանության կուրատորի դերը, բնականաբար, Փաշինյանի «դաբրոյով»։ Նա վարչապետի սիրելիներից է` ժամանակին ցուցմունք տվեց Ռուբեն Վարդազարյանի դեմ եւ արագ թռիչքով հասավ ԱԱԾ։

Ըստ լուրերի՝ Սիմոնյանը նաեւ անձնական խնդիր ունի` ինչ-որ հարցով դիմել է Անդրեասյանին, մերժվել եւ հայտարարել, որ նա արժանանալու է Ջհանգիրյանի ճակատագրին։ Համակարգի մեր աղբյուրները չեն բացառում նաեւ, որ իշխանությունը փորձում է Կարեն Անդրեասյանին ավելի հնազանդեցնել, թեեւ սրանից ավելին երեւի չի լինում»:

«Փաստ» օրաթերթը գրում է

Հունիսի 27-ին 44-օրյա պատերազմի հանգամանքներն ուսումնասիրող խորհրդարանական քննիչ հանձնաժողովում «ես անմեղ եմ, մնացյալ բոլորն են մեղավոր» «սերիալի» շրջանակներում Նիկոլ Փաշինյանը հինգ ժամից ավելի խոսեց՝ այս «սերիայում» հարցուպատասխանի ֆորմատով։ «Փաստ» թերթի տեղեկություններով, քննարկումից հետո Փաշինյանը բավականին ուշ է հեռացել խորհրդարանից (խորհրդարանում խոսում են, որ մինչև դռնփակ նիստի ավարտը քպական պատգամավորները զգաստ նստած են եղել իրենց սենյակներում և սպասել «շեֆին»). դռնփակ նիստից հետո Փաշինյանը խմբակցությունում հանդիպել է իր պատգամավորների հետ ու շնորհակալություն հայտնել։

Մեր աղբյուրի փոխանցմամբ, նա ասել է, որ տպավորված է հանձնաժողովի անդամ թիմակիցների «կառուցողական» քննարկումից, հատկապես որոշ «չոր» հարցադրումների ոճից, իսկ ավելի ճիշտ՝ հանձնարարությունները ճիշտ կատարելուց։ Ի դեպ, թերթին հայտնի է դարձել, որ դռնփակ հանդիպումը կայացել է զուտ արարողակարգի համար, որպեսզի տեղեկատվական տեսանկարահանում և նիստի արձանագրություն կազմվի, քանի որ նա փաստացի իր թիմակիցների համար «գերգաղտնի» ու նորություն հանդիսացող ոչինչ չի ասել, ավելին՝ ուղիղ եթերում հայտարարած «փակ ռեժիմով» որևէ տեղեկություն հայտնելու պնդումները հիմնականում ինտրիգ ապահովելու նպատակով էր արված։

Խորհրդարանի մեր աղբյուրը նաև հայտնում է, որ բոլոր հարցադրումները, ինչպես և սպասվում էր, նախապես հստակ բաշխված ու պլանավորված են եղել, իսկ Դավիթ Սանասարյանին այս գործընթացում ներգրավելու և այդքան «արտոնյալ» հարցադրումներ անելու հնարավորությունը տրված էր հատուկ ՀՀ արտաքին քաղաքական վեկտորի փոփոխության թեման այս փուլում ևս մեկ անգամ շեշտելու նպատակով՝ կոնկրետ ուղղությամբ մեսիջներ հասցնելու համար։