Ադրբեջանի նախագահ Իլհամ Ալիևի նախկին թիկնապահ Մահիր Մամեդովին մահացած են գտել Թուրքիայի արևմտյան Այդըն քաղաքի Քուշադասի հանգստյան գոտում տեղակայված հյուրանոցներից մեկում։
Մահվան ստույգ պատճառը դեռ պարզված չէ։ Տղամարդը մահացել է 50 տարեկանում։
Haber48-ը գրել է, որ Մահիր Մամեդովն իր ընտանիքի հետ երեք օր առաջ արձակուրդի համար Թուրքիա էր ժամանել։ Նրանք տեղավորվել էին հինգաստղանի հյուրանոցում։ Մամեդովի մարմինը հայտնաբերել է կինը՝ զբոսնելուց հետո որդու հետ սենյակ վերադառնալով։
Թուրքական լրատվամիջոցները նշել են, որ Մահիր Մամեդովը «որոշ ժամանակ» եղել է Իլհամ Ալիևի անձնական անվտանգության աշխատակիցը։ Թե որ ժամանակահատվածում, չի նշվում։