Արցախի Հանրապետության գյուղատնտեսության նախարար Նորայր Մուսայելյանը բավարար էր գնահատել Արցախում բերքատվության ցուցանիշները։ Վերջինս նշել էր, որ հացահատիկայինների բերքահավաքը, միջին բերքատվությունը տատանվում է հեկտարից 14-22 ցենտների միջակայքում։
«Իրազեկ և պաշտպանված սպառող» ՀԿ նախագահ Բաբկեն Պիպոյանը MediaHub.am-ի հետ զրույցում նշեց, որ իրականում այս հայտարարությունը շփոթություն է առաջացնում և շատերը կարծում են, որ խոսքը պարենի բավարար լինելու մասին է։
«Ըստ հայտարարության՝ ոչ թե քննարկվում է Արցախում առկա պաշարները, ոչ թե քննարկվում է նախորդ տարիների համեմատ՝ ընդհանուր Արցախում արտադրված ցորենի ծավալը, որի մի մասը մնում էր այնտեղ, մի մասը գալիս էր ՀՀ, այլ հայտարարությունն այն մասին է, որ բերքատվության միջին ցուցանիշը բավարար է։ Իսկ թե ինչպիսին է պատկերը ինքնաբավության կամ արտահանելու մասով՝ դժվար է ասել, քանի որ այս պահին պաշտոնական տվյալ առկա չէ։ Ինչի մասին որ խոսում են, ինքնաբավության հետ որևէ կապ չունի»,-ընդգծեց Պիպոյանը։
ԱՀ Ֆինանսաբյուջետային և տնտեսական կառավարման հարցերի մշտական հանձնաժողովի անդամ Դավիթ Գալսյանը ևս MediaHub.am-ի հետ զրույցում նշեց, որ ակնհայտ է՝ այս պայմաններում Արցախը երբևէ ինքնաբավ չի կարող լինել։ «Իրականում, մենք այս պահին ավելի շատ մտահոգված ենք Բերձորը շրջանցող ճանապարհի կառուցման հարցերով, մնացած հարցերը երկրորդական են, Արցախը կորցնելու վտանգը չի թողնում, որ այս փուլում գյուղատնտեսական հարցերը կարևորենք»,- շեշտեց նա։
Լիաննա Թորոսյան