Կորոնավիրուսով վարակված ԱՄՆ նախագահ Ջո Բայդենի հիմնական ախտանիշը մնում է կոկորդի ցավը, հայտնում է նրա բժիշկը, փոխանցում է «ՌԻԱ Նովոստի»-ն:
Բայդենին բուժող բժշկի եզրակացության համաձայն, որը տարածել է Սպիտակ տան մամուլի ծառայությունը, նախագահի առողջական վիճակը շարունակում է բարելավվել։ «Նրա հիմնական ախտանիշը կոկորդի ցավն է»,- ասում է բժիշկը։ Ըստ նրա՝ սա լավ նշան է, քանի որ սա շնչուղիների արձագանքն է վիրուսի դեմ օրգանիզմի պայքարին։
«Ջերմությունը, ճնշումը, զարկերակը, շնչառությունը նորմալ է։ Նրա թոքերը մաքուր են»,- ասվում է զեկույցում։
«Նախագահը երբեմն հազում է, և նրա ձայնը «մի քիչ ցածրացել է»»,- տեղեկացրել է բժիշկը։
Հինգշաբթի օրը հաղորդվել էր, որ Բայդենի կորոնավիրուսի թեստը դրական է եղել։ Վարչակազմից հայտնել են, որ բժշկական կարգավորող մարմնի պահանջներին համապատասխան՝ նախագահը հինգ օր կարանտինում կլինի, որից հետո կկարողանա վերադառնալ բնականոն աշխատանքի։