Այսպես կոչված խաղաղության պայմանագրի ստորագրումն ուշանում է և սրանով պայմանավորված Թուրքիան և Ադրբեջանը ճնշումներ են գործադրում Հայաստանի վրա, քանի որ իրենց պահանջները չեն բավարարվում։ Այս մասին այսօր MediaHub-ի հետ զրույցում ասաց թուրքագետ Անդրանիկ Իսպիրյանը՝ խոսելով վերջին շրջանում Թուրքիայի և Ադրբեջանի կառավարությունների հանդիպումների, միասնական քայլերի և պատերազմի վտանգի մասին։
«Թուրքիան և Ադրբեջանը ոտնահարում են Հայաստանի և Արցախի ինքնիշխանության իրավունքը։ Երկու թշնամի պետություններն ուղղակի հոգեբանական և ֆիզիկական ճնշում են գորածդրում երկու հայկական պետությունների նկատմամբ։ Վերջին օրերին նաև տեսանյութեր ենք տեսնում, որ Ադրբեջանը զորք է տեղափոխում Հայաստանի հետ սահմանագոտի։ Բնականաբար, այս համատեքստում պետք է նկատել, որ Հայաստան-Թուրքիա հարաբերությունների կարգավորման գործընթացը ևս կանգնած է, որը ևս մեկ անգամ ապացուցում է, որ Թուրքիան առանց Հայաստան-Ադրբեջան խաղաղության պայմանագրի չի նախատեսում Հայաստանի հետ սահման բացել և այս պահին պարզապես շարունակում է Ադրբեջանին աջակցել»,- ասաց նա։
Հարցին, թե ինչպե՞ս է այս ամենին արձագանքում ՀՀ-ն, քանի որ սադրանքների շղթա է սկսվել, մեր զրուցակիցը նշեց.
«Այս հարցի պատասխանը իշխանությունը պետք է տա։ Հայաստան-Ռուսաստան հարաբերությունները լարված են և նույն ժամանակ ԱՄՆ-ից, ԵՄ-ից աջակցություն ստանալու հույսով էլ պետք է չապրենք, քանի որ իրենք բացի մի քանի հայտարարություններից այլ բան չեն անում։ Հայաստանի դաշնակիցը փաստացի մեզ հետ այս պահին լավ հարաբերություններ չունի և այդ հարաբերությունները փրկել պիտի մեր Կառավարությունն ուզի, բայց սա էլ չենք տեսնում։ Ադրբեջանը նույնիսկ անտեսում է ՄԻԵԴ-ի որոշումները, այսքանից հետո Հայաստանը միայնակ ի՞նչ կարող է անել, ի՞նչ անվտանգային երաշխիքներ ունի և ումից է այն ուզում․ սա իշխանությունների գերխնդիրն է, որ լուծեն անվտանգային խնդիրները։ Հուսով եմ՝ մեր իշխանությունները գոնե պահեստային տարբերակներ ունեն, որպեսզի իրավիճակը շտկեն»։
Լիաննա Թորոսյան