ԱՄՆ նախագահ Դոնալդ Թրամփի՝ Ուկրաինայի և Ռուսաստանի հարցերով հատուկ ներկայացուցիչ Քիթ Քելլոգը հինգշաբթի օրը Կիեւում հանդիպել է Ուկրաինայի նախագահ Վլադիմիր Զելենսկու հետ։
Հանդիպումից հետո նախատեսված համատեղ մամուլի ասուլիսը չեղարկվել է ամերիկյան կողմի խնդրանքով, գրել են ԶԼՄ-ները։
Ժամանելու օրը՝ չորեքշաբթի, Քելլոգը հայտարարել է, որ իր այցի հիմնական նպատակը ուկրաինական կողմին լսելն է։
Նախագահ Թրամփի՝ ազգային անվտանգության հարցերով խորհրդական Մայք Ուոլցը կոչ է արել Ուկրաինային մեղմել ԱՄՆ-ի հասցեին հնչեցրած իր քննադատությունն ու համաձայնել Սպիտակ տան նախաձեռնած համաձայնագրին հանքանյութերի մատակարարումների վերաբերյալ:
Փոխնախագահ Ջեյ Դի Վենսը հինգշաբթի կարծիք է հայտնել, որ հակամարտության վերջը մոտ է: Նա նաև ընդգծել է, որ առանց Ռուսաստանի հետ բանակցությունների անհնար է դադարեցնել պատերազմը։
Զելենսկին նշել է, որ Քելլոգի հետ զրույցի ընթացքում քննարկվել են ճակատում տիրող իրավիճակը, բոլոր ուկրաինացի գերիներին վերադարձնելու և Ուկրաինայի համար արդյունավետ միջազգային անվտանգության երաշխիքների որոնումը։
Զելենսկին Թրամփի հատուկ բանագնացին հաստատել է Կիեւի պատրաստակամությունը «ԱՄՆ նախագահի հետ ներդրումների և անվտանգության վերաբերյալ ամուր, իսկապես օգտակար համաձայնության»: Այդ կապակցությամբ քննարկման հիմնական թեման է եղել ուկրաինական հանքային պաշարների օգտագործման վերաբերյալ Թրամփի կողմից նախկինում առաջարկված համաձայնագիրը։
Լրատվամիջոցների տվյալներով՝ Թրամփի վարչակազմն առաջարկել է Ուկրաինային հատկացնել ԱՄՆ-ին հազվագյուտ հանքանյութերի սեփականության 50 տոկոսը, սակայն նախագահ Զելենսկին, ինչպես ավելի վաղ հաղորդվել էր, փաստաթուղթը ուսումնասիրելուց հետո, հրաժարվել է ստորագրել այն։
Հինգշաբթի օրը ամերիկյան «AXIOS» լրատվական կայքը, հղում անելով իր աղբյուրներին, հայտնել է, որ Թրամփի վարչակազմը Ուկրաինային տրամադրել է հանքային գործարքի «բարելավված» նախագիծ այն բանից հետո, երբ նախագահ Զելենսկին զայրացրել է նախագահ Թրամփին՝ մերժելով նրա նախնական առաջարկը: