Բաքվի բռնապետի անմիջական նախաձեռնությամբ Ադրբեջանում հավատարմագրված օտարերկրյա պետությունների դեսպաններին ու ռազմական կցորդներին տանում են օկուպացված Քարվաճառ։
Ըստ ադրբեջանական աղբյուրների՝ դիվանագիտական կորպուսի ներկայացուցիչները լինելու են «Քարվաճառ-1» հիդրոէլեկտրակայանի տարածքում, կառուցվող թունելների, մզկիթների տարածքում ու մի շարք այլ վայրերում։
Ադրբեջանական լրատվամիջոցները գրում են նաև, թե այցի գլխավոր նպատակը դիվանագիտական կորպուսի ներկայացուցիչներին ծանոթացնելն է, իբր, հայերի կողմից Քարվաճառում իրականացված հանցագործություններին։
Նշենք, որ օրեր առաջ հայտնի էր դարձել, որ օկուպացված հայկական տարածքներում սեփական բարբարոսությունները կոծկելու համար Ադրբեջանը որոշել է իր իսկ կողմից օկուպացված Կովսականում , այսպես կոչված, «օկուպացիայի» թանգարան հիմնել։
Ըստ էության՝ բացառապես կեղծիքի վար կառուցված քարոզչությամբ արհեստածին Ադրբեջանը, ցավոք, շարունակում է մոլորության մեջ գցել հայ-ադրբեջանական հակամարտության մասին իրական ինֆորմացիա չունեցող օտարերկրացիներին ու միջազգային տարբեր կառույցների։