«Ժողովուրդ» օրաթերթը գրում է.

««Ժողովուրդ» օրաթերթի տեղեկություններով՝ Գյումրու կալանավորված քաղաքապետ Վարդան Ղուկասյանը գրությամբ դիմել է ԱԱԾ մեկուսարանի պետ Ռոբերտ Թամարյանին՝ խնդրելով իրեն տեղափոխել ԱԱԾ մեկուսարանում կալանքի տակ գտնվող Բագրատ սրբազանի եւ Միքայել սրբազանի խուց, որպեսզի ձերբակալված սրբազանների հետ կրի կալանքը։ Սակայն «Երեւան-Կենտրոն» քրեակատարողական հաստատության ղեկավար կազմը մերժել է նրա դիմումը։

Նշենք, որ Վարդան Ղուկասյանի դեմ հարուցվել է չորս քրեական գործ՝ երկու կոռուպցիոն բնույթի, իսկ մյուս երկու գործերը վերաբերում են նրա կողմից հրապարակային հնչեցված արտահայտություններին»։

«Հրապարակ» թերթը գրում է․ 

Սրբազան պայքարի գոր­ծով անցնող միակ կին բանտարկյալ Լիդիա Մանթաշյանի խափանման միջոցը չփոխելու հարցը շարունակում է քաղաքական-հասարակական շրջանակների քննարկման առանցքում մնալ: Գործով անցնող բազմաթիվ տղամարդկանց կալանքը տնային կալանքով կամ վարչական վերահսկողությամբ փոխվելուց հետո շատերին է հետաքրքրում, թե ինչու չեն փոխում Լիդիայի խափանման միջոցը` ինչ է արել այս աղջիկը, որի նկատմամբ ռեժիմը նման դաժանությամբ վրեժխնդիր է լինում։

Մենք օրեր առաջ գրել էինք ՔՊ կուլիսներում ընթացող վարկածներից մեկի մասին, թե Լիդիան էր Վահագն Ալեքսանյանի արդեն հանգուցյալ մոր հետ հայտնի միջադեպի ժամանակ բախվել:

Դա տեղի է ունեցել գարնանը, երբ Սրբազան շարժման անդամները Նիկոլ Փաշինյանին անվստահության հարցումն էին անում։ Սակայն մի ստվար զանգված էլ կարծում է, որ Լիդիա Մանթաշյանի նկատմամբ Փաշինյանն անձնական վրեժ ունի, քանի որ նա էր Փաշինյանի խրտվիլակով տպավորիչ ակցիայի գլխավոր հերոսուհին եւ կատաղի պայքար էր մղում, որ խրտվիլակին ոստիկանները «բերման չենթարկեին»։

Այդ ակցիան Սրբազան պայքարի ներկայացուցիչներն իրականացրին անցած տարվա հոկտեմբերին՝ դատախազության շենքի մոտ։ Փաշինյանի խրտվիլակը կալանավորի հագուստով էր, ակցիայի մասնակիցները պահանջում էին Նիկոլ Փաշինյանի դեմ քրեական գործ հարուցել՝ Արցախում ցեղասպանությանը, էթնիկ զտմանը հանցակցության համար:

«Ժողովուրդ» օրաթերթը գրում է.

«Արարատի համայնքապետ Ասլան Ավետիսյանը, ով մամուլի հրապարակումների համաձայն՝ «Մարտի 1»-ի դեպքերի ակտիվ մասնակից է եղել, նախորդ տարի ներգրավված է եղել բնակարանների ձեռքբերման եւ օտարման գործընթացներում։

Ինչ է գրել մամուլը Ասլան Ավետիսյանի մասին

Ասլան Ավետիսյանը Արարատի համայնքապետ է ընտրվել 2021 թվականին։ Նա անցել է «Մարտի 1»-ի գործով։ Տարիներ առաջ դատարանը հաստատված էր համարել մեղադրանքը առ այն, որ «Ասլանյանը 2008թ. մարտի 1-ին Երեւան քաղաքի Գրիգոր Լուսավորիչ փողոցում բռնություններով, ջարդերով, հրկիզումներով, բացահայտ հափշտակություններով, իշխանության ներկայացուցիչներին զինված դիմադրություն ցույց տալով, նրանց նկատմամբ հրազենի, պայթուցիկ նյութերի, որպես զենք օգտագործելու համար հարմարեցված տարատեսակ առարկաների գործադրմամբ խմբակային հարձակումներով իրականացված, ինչպես նաեւ մարդկային զոհերի պատճառ դարձած, զանգվածային անկարգությունների ժամանակ չի ենթարկվել իշխանության ներկայացուցիչ հանդիսացող ոստիկանության աշխատակիցների օրինական պահանջներին, այլ, ավելին, նման պահանջ է ներկայացրել նրանց` դիմելով անկարգությունների, մասնակիցներին, կոչեր է արել ոստիկանության աշխատակիցների պահանջներին ակտիվորեն չենթարկվելու, նրանց վրա հարձակվելու եւ բռնությամբ, ուժի գործադրմամբ Մյասնիկյանի արձանի եւ ՀՀ-ում Ֆրանսիայի դեսպանատան հարակից տարածքից «վռնդելու». իր օրինակով հրահրել եւ ոգեւորել է մյուսներին, մոտեցել ոստիկանության աշխատակիցներին եւ բղավել՝ «թողե՛ք, հեռացե՛ք, հակառակ դեպքում՝ զոռով հանելու ենք ձեզ»:

Նրա նկատմամբ կիրառվել էր կալանք ընդամենը կես տարի, ինչից հետո ազատ էր արձակվել ստորագրությամբ։ 2021 թվականի մայիսին Ասլան Ավետիսյանը արդարացվել է, իսկ ամիսներ անց դարձել համայնքապետ։

2024 թվականի անշարժ գույքի, եկամուտների, շահերի եւ ծախսերի հայտարարագրի համաձայն՝ Ասլան Ավետիսյանը տարեսկզբին ունեցել է 2 գույք՝ մեկ անհատական բնակելի տուն եւ մեկ բնակարան՝ համապատասխանաբար Արաբկիր եւ Աջափնյակ վարչական շրջաններում։

2024 թվականին նա ժառանգությամբ ստացել է եւս մեկ անհատական տուն Արարատում, որը մեկ ամիս անց նվիրատվությամբ փոխանցել է Հովհաննես Ասլանի Ավետիսյանին։

Տրանսպորտային միջոցներ համայնքապետը չի հայտարարագրել։

Նրա բանկային հաշիվների մնացորդը կազմել է 2 մլն 375 հազար դրամ, իսկ կանխիկ միջոցները կազմել են 8 մլն դրամ։

Հաշվետու տարվա եկամուտները կազմել են 7 մլն 274 հազար դրամ, որից 5 մլն 895 հազար դրամը Արարատի համայնքապետարանի աշխատակազմից ստացած աշխատանքի վարձատրությունն է, իսկ 1 մլն 379 հազար դրամը եկամտային հարկի վերադարձ է։

Արարատի համայնքապետի որդուն է պատկանում «Ավանգարդ Սթոն» ՍՊԸ-ն, որը նախորդ տարի դիմել է Ավշար բնակավայրի ավագանուն եւ ցանկանում էր Արարատ համայնքի Ավշար բնակավայրի տարածքում գտնվող տրավերտինների եւ կավերի հանքավայրում հանքարդյունահանում իրականացնել։ Իրավական անձանց պետական ռեգիստրում իրական շահառուն Նարեկ Ավետիսյանն է։

«Սալակիթ» ՍՊԸ-ն, որը, ըստ Ասլան Ավետիսյանի հայտարարագրի, պատկանում է Ռոզա Զովելյանին՝ համայնքապետի կնոջը, 2004 թվականին լիցենզավորվել է դեղատնային գործունեության համար (դեղատնային կրպակ) եւ ստացել է անժամկետ լիցենզիա։ Պետական ռեգիստրի տվյալներով՝ ընկերությունն այս պահին եւս գործում է։ Ռոզա Զովելյանը նախորդ տարի որեւէ եկամուտ չի ստացել»։