Երեւանի բնակիչ 1 տարի 5 ամսվա ժամկետային զինծառայող 19-ամյա Գեւորգ Ներսիսյանը զոհվել է Ջերմուկի ուղղությամբ մարտերի ժամանակ: NEWS.am-ի հետ զրույցում նրա ընկերը` պատմել է, որ Գեւորգի հետ նույն դիրքում է եղել նրա հարազատ եղբայրը, որը նույնպեսժամկետային զինծառայող է:
«Գեւորգը եղբոր հետ էր ծառայում Ջերմուկում, եղբայրը մեկ տարվա զինծառայող էր, ադրբեջանական հարձակման ժամանակ նրանք երկուսով մի դիրքում են եղել: Գեւորգը ընկերոջ հետ կրակն իր վրա է վերցրել, փրկել է եղբոր ու դիրքում գտնվող մյուս տղաների կյանքը, ինքն ու ընկերը զոհվել են»,- ասել է նա:
Ընկերը պատմեց, որ Գեւորգը մինչեւ բանակ գնալը սպորտով է զբաղվել, հաճախել է ձյուդոյի:
«Գեւորգը որ զանգում էր, միշտ ասում էր, որ երազում էխաղաղություն լինի, շուտ ծառայեն, վերադառնան տուն:Շատ ընկերասեր ու բարի տղա էր, նա օրինակ էր ծառայում բոլորի համար»,- պատմել է ընկերը:
Գեւորգ Ներսիսյանը հուղարկավորվել է «Եռաբլուր» զինվորական պանթեոնում: