Միացյալ Նահանգների նախագահ Դոնալդ Թրամփը հայտարարել է, որ պաղեստինյան «Համաս» խմբավորումը երեք կամ չորս օր ունի Գազայի հրադադարի վերաբերյալ իր առաջարկին արձագանքելու համար։
««ՀԱՄԱՍ»-ը կամ կանի դա, կամ ոչ, իսկ եթե ոչ, դա շատ տխուր ավարտ կունենա»,- նշել է Թրամփը։
Նրա խոսքով՝ իսրայելցի և արաբ առաջնորդներն արդեն ընդունել են ծրագիրը։
Ծրագիրը 20 կետից բաղկացած փաստաթուղթ է․ դրանով կոչ է արվում անհապաղ հրադադար հաստատել Գազայի հատվածում, «Համաս»-ի կողմից պահվող իսրայելցի գերիներին փոխանակել իսրայելական բանտերում պաղեստինցիների հետ, իսրայելական զորքերը փուլ առ փուլ դուրս բերել Գազայից:
Բացի այդ, խմբավորումը պետք է զինաթափվի, ԱՄՆ-ն կաշխատի արաբական ու միջազգային գործընկերների հետ՝ ստեղծելու «ժամանակավոր միջազգային կայունացնող ուժեր»: «Համաս»-ը ոչ մի դեր չի խաղալու Գազայի հատվածի կառավարման մեջ, անդամներին կառաջարկվի համաներում՝ «խաղաղ գոյակցության» պարտավորություն ստանձնելու դեպքում, իսկ Գազան լքել ցանկացողներին կտրամադրվի անվտանգ մեկնում:
Ծրագիրը նախատեսում է նաև տեխնոկրատների անցումային կառավարության ստեղծում՝ Գազայի հատվածում առօրյա կյանքն ապահովելու համար, ինքնակառավարում, տեղահանված բնակիչների վերադարձ և երաշխիքներ, որ «Գազայի բնակիչները չեն վտարվի»: