ԼՂ խնդրի պարագան մեզ բերել է անհաջողություն, քանի որ մենք երբեք չենք մտածել՝ Ղարաբաղի հարցը մի հարց է, որը մենք պետք է օգտագործենք իշխանության մնալու ու ներքաղաքական խնդիրներ լուծելու համար։ Այդ մասին այսօր ՔՊ հանագումարի ընթացքում ասաց Նիկոլ Փաշինյանը։
Նրա խոսքով՝ իրենք ԼՂ խնդրի հետևից գնացել են իրենց ծրագրին համապատասխան։
Իր ելույթում Փաշինյանը երկու մեջբերում արեց, որոնցից առաջինը «ՀՀ անկախության հռչակագրից» էր, մյուսը՝ ՔՊ կուսակցության ծրագրից։
«Եվ 44-օրյա պատերազմից հետո ինձ ուղղված հիմնական մեղադրանքն այն էր, որ ես ասել եմ՝ Արցախը Հայաստան է, և՛ վերջ, մի բանի մասին է վկայում, որ ՀՀ անկախության առաջին օրից սկսած, ըստ էության, ՀՀ անկախության հիմունքները հետևողականորեն քայքայվել ու փլուզվել են։ Որովհետև հռչակագրի ընունման առաջին օրից այս ծրագրից հրաժարում է տեղի ունեցել»,- նշեց Փաշինյանը։
Նրա խոսքով՝ այն ժամանակ, երբ ԼՂ-ն անկախություն էր հռչակում, բանակցությունների ընթացքում այս հռչակագրից շեղում է տեղի ունեցել։
«Իսկ 2007-ին, Մադրիդյան սկզբունքներն ընդունելով, իշխանությունները ոչնչացրին ԼՂ անկախության հռչակման իրավական հիմքերը։ Եվ մենք, ըստ էության, իշխանության գալով, առերեսվելով այս իրավիճակի հետ, մեզնից կախված ամեն ինչ արեցինք, որ Հայաստանի պետականության հիմունքները նորոգենք»,- ասաց Փաշինյանը։