Ֆուտբոլի Ազգերի լիգայի չորրորդ տուրում Հայաստանի հավաքականը Երեւանի Վազգեն Սարգսյանի անվան «Հանրապետական» մարզադաշտում ընդունեց Հյուսիսային Մակեդոնիայի թիմին եւ պարտություն կրեց 0:2 հաշվով:
Հանդիպումից անմիջապես հետո Հայաստանի ազգային հավաքականի գլխավոր մարզիչ Ալեքսանդր Պետրակովը հեռացվել է զբաղեցրած պաշտոնից։
ՀՖՖ հապճեպ որոշումը հասկանալի է՝ փորձ արվեց ֆուտբոլասերների դժգոհության թիրախ դարձնել մարզչին, ով, անշուշտ, պատասխանատու է ստեղծված իրավիճակի համար, սակայն միամիտ կլինի համակարգային պրոբլեմների ողջ պատասխանատվությունը դնել Պետրակովի վրա:
Սակայն, ֆուտբոլասերներին ֆեդերացիայի հապճեպ որոշումը չբավարարեց:
Հայաստան-Մակեդոնիա խաղից հետո, բազմաթիվ երկրպագուներ երթով շարժվել են ֆուտբոլի ֆեդերացիա, որտեղ հանդիպում են պահանջել ՀՖՖ նախագահ Արմեն Մելիքբեկյանի հետ։
Մելիքբեկյանը, ինչպես նաև նրա տեղակալ Արմեն Նիկողոսյանը, բնականաբար, հանդիպման չեն ներկայացել:
Կարծում եմ՝ օբյեկտիվ հանրային դժգոհությունը համակարգային բնույթ պետք է կրի, ի վերջո՝ հանգեցնի լուրջ խոսակցության ֆուտբոլի, նրա ենթակառուցվածքների, հավաքականի, ակումբների առաջնության մասին:
ՀՖՖ այս ղեկավարությունը պետք է հեռանա՝ անպայման, բայց դա շատ ավելի լուրջ և խորքային գործընթացի մեկնարկ պետք է դառնա:
Սուրեն Սուրենյանց