Գերմանիան, Ֆրանսիան, Իտալիան, Նիդեռլանդները եւ Լեհաստանը սկսել են օգտագործել ստորգետնյա պահեստներից գազի պաշարները, ինչը վկայում է Եվրոպական միության ձմեռային ջեռուցման սեզոնի մեկնարկի մասին։ Միաժամանակ գազի պաշարների արդյունահանումը տեղի է ունեցել երկու շաբաթ ուշացումով՝ ջերմաստիճանի սեզոնային անկման պատճառով, հաղորդում է «Ինտերֆաքսը»։
«Եվրոպայի գազի հինգ խոշոր շուկաները՝ Գերմանիան, Ֆրանսիան, Իտալիան, Նիդեռլանդները եւ Լեհաստանը, անցել են ստորգետնյա պահեստներից գազի օգտագործման: Ջերմաստիճանի սեզոնային անկումը, թեկուզ երկու շաբաթ ուշացումով, պաշտոնապես բացում է Եվրոպայում ձմեռային սեզոնի մեկնարկը։
Գազի բորսայական գներն արձագանքել են ԵՄ խոշորագույն շուկաներից վառելիքի պաշարների օգտագործմանը՝ գնանշումների ավելացմամբ: Նիդեռլանդների TTF հանգույցում մեկ օր առաջ (երկուշաբթի) առաքման պայմանագիրը փակվել է 1000 խորանարդ մետրի դիմաց 583 դոլարի մակարդակում: Այս ցուցանիշը երկու անգամ գերազանցել է շաբաթվա կեսի տվյալները (225 դոլար), ասվում է հոդվածում։