ՄԱԿ-ի Գլխավոր ասամբլեան արտահերթ նստաշրջանում բանաձև է ընդունել, որով կոչ է անում Ռուսաստանին դադարեցնել ռազմական գործողությունները և դուրս բերել զորքերը Ուկրաինայից, փոխանցում է BBC News-ը։
Բանաձևին կողմ է քվեարկել 141, դեմ՝ 7, ձեռնպահ՝ 32 երկիր։ Բանաձևում նշվում է, որ ՄԱԿ-ը.
Կոչ է անում պահպանել ՄԱԿ-ի կանոնադրության սկզբունքները, որոնք ընկած են Ուկրաինայում համապարփակ, արդար և կայուն խաղաղության հասնելու հիմքում;
Վերահաստատում է իր հավատարմությունը Ուկրաինայի ինքնիշխանությանը, անկախությանը, միասնությանը և տարածքային ամբողջականությանը նրա միջազգայնորեն ճանաչված սահմաններում, ներառյալ նրա տարածքային ջրերը;
Կրկին հայտարարում է Ռուսաստանի Դաշնությունից իր պահանջը՝ անհապաղ, ամբողջությամբ և անվերապահորեն դուրս բերել իր բոլոր զինված ուժերը Ուկրաինայի տարածքից՝ իր միջազգայնորեն ճանաչված սահմաններում;
Կոչ է անում բոլոր կողմերին պահպանել միջազգային իրավունքը, այդ թվում ՝ ռազմագերիների նկատմամբ վերաբերմունքի և քաղաքացիական բնակչության պաշտպանության ոլորտում;
ՄԱԿ-ը նաև հայտարարում է Ուկրաինայի տարածքում կատարված հանցագործությունների համար մեղավորներին պատասխանատվության ենթարկելու անհրաժեշտության մասին՝ պատշաճ, արդար և անկախ հետաքննություն անցկացնելու և ազգային կամ միջազգային մակարդակով դատական հետապնդում իրականացնելու միջոցով:
Հայաստանը ձեռնպահ մնացողների թվում է այնպիսի երկրների հետ, ինչպիսիք են Չինաստանը, Հնդկաստանը, Իրանը, Ղազախստանը, Տաջիկստանը, Ուզբեկստանը:
Ադրբեջանը քվեարկությանը չի մասնակցել, իսկ Վրաստանը բանաձևին կողմ է քվեարկել: